ٹوئٹر کی اعتدال پسندی کی پالیسی میں کوئی تبدیلی نہیں :ایلن مسک

0

لاس اینجلس (یو این آئی) اسپیس ایکس کے بانی ارب پتی ایلن مسک نے کہا ہے کہ ٹویٹر کے مواد کی اعتدال پسندی کی پالیسیوں میں فی الحال کوئی تبدیلی نہیں کی جائے گی۔ ٹویٹر کے قبضے کے حوالے سے مسٹر مسک نے کہاکہ میں بالکل واضح کرنا چاہتا ہوں کہ ہم نے ابھی تک ٹویٹر کے مواد کی اعتدال پسندی کی پالیسیوں میں کوئی تبدیلی نہیں کی ہے ۔اس سے قبل وہ کہہ چکے ہیں کہ جلد ہی ٹوئٹر کے لیے ایک نئی کنٹینٹ ماڈریشن کونسل بنائی جائے گی۔ یہ کونسل مواد کی اعتدال سے متعلق فیصلے کرے گی۔ اس کونسل کے جائزے کے بعد ہی بند کھاتوں کو بحال کرنے کا فیصلہ کیا جائے گا۔ انہوں نے ٹویٹ کیا ’معمولی اور قابل اعتراض وجوہات کی بنا پر معطل ہونے والے کسی بھی فرد کو‘ٹویٹر جیل سے رہا کر دیا جائے گا۔ ‘کامیڈی اب ٹویٹر پر قانونی ہے۔ رپورٹ کے مطابق مسٹر مسک کی جانب سے ٹوئٹر کی باگ ڈور سنبھالنے کے بعد کئی سینئر لوگوں نے مائیکروبلاگنگ سائٹ چھوڑنے کا اعلان کیا ہے ۔ رپورٹ میں کہا گیا کہ ممکنہ تبدیلیوں نے ریگولیٹرز کی طرف سے جانچ پڑتال کی ہے اور ٹویٹر کے اپنے صارفین کو تقسیم کر دیا ہے ۔ کچھ کو تشویش ہے کہ مسٹر مسک نفرت انگیز تقریر اور غلط معلومات کو کنٹرول کرنے والے قوانین کو ڈھیل دیں گے اور کچھ کا خیال ہے کہ پچھلی انتظامیہ میں حد سے زیادہ سخت قوانین تھے جس سے اظہار رائے کی آزادی میں کمی آئی۔ مسٹر مسک نے کہا کہ ٹویٹر وسیع پیمانے پر متنوع نقطہ نظرکے ساتھ ایک کونسل بنائے گا۔ کونسل کے جائزے سے پہلے مواد سے متعلق کوئی بڑا فیصلہ یا اکاؤنٹ کی بحالی نہیں ہوگی۔مسٹر مسک نے جمعرات کو ٹویٹر کے حصول کے ساتھ چار سینئر ایگزیکٹوز کو معزول کر دیا، جن میں چیف ایگزیکٹو آفیسر پراگ اگروال، پالیسی سربراہ اور اعلیٰ قانونی امور کے ایگزیکٹو وجے گاڈے شامل ہیں۔امریکہ کی سب سے بڑی کار ساز کمپنی اور مسک کی ٹیسلا کمپنی کی حریف جنرل موٹرز کا کہنا ہے کہ اس نے ٹوئٹر پر اپنے اشتہارات کو عارضی طور پر روک دیا ہے ۔

سوشل میڈیا پر ہمارے ساتھ جڑنے کے لیے یہاں کلک کریں۔ Click 👉 https://bit.ly/followRRS