کووڈ اور ہوا بازی کی پالیسی پر کجریوال بات کرنے کے اہل نہیں: وزارت خارجہ

0

نئی دہلی: ( یواین آئی) کورونا وائرس کے سنگاپور ویرینٔٹ کےحوالہ سے دہلی کے وزیراعلی اروند کجریوال کے ٹوئٹ سے ناراض سنگاپورکو آج ہندوستان نے واضح کیا ہے کہ کووڈ کے ویریئنٹ اورشہری ہوا بازی کی پالیسی کے بارے میں باضابطہ طور پر دہلی کے وزیر اعلیٰ اروند کجریوال کچھ بھی کہنے کے اہل نہیں ہیں۔


وزارت خارجہ کے ترجمان ارندم باگچی نے یہاں ٹوئٹر پر مطلع کیا کہ سنگاپور حکومت نے ہندوستان کے ہائی کمشنر پی کمار کو طلب کیا اور دہلی کے وزیراعلی کجریوال کے اس ٹویٹ پر سخت اعتراض کیا جس میں انہوں نے سنگاپور ویریئنٹ کے بارے میں بات کہی ہے۔
باگچی نے کہا کہ ہائی کمشنر نے سنگاپور حکومت کو بتایا ہے کہ دہلی کے وزیر اعلی اروند کجریوال کووڈ کی مختلف اقسام اور شہری ہوا بازی کی پالیسی کے بارے میں باضابطہ طور پرکچھ نہیں کہہ سکتے ہیں۔


سنگاپور کی وزارت خارجہ نے بدھ کے روز ایک بیان میں کہا ہے کہ’فیس بک‘اور’ٹوئٹر‘پر دہلی کے وزیر اعلی اروند کجریوال کے بیان میں کہا گیا ہے کہ سنگاپور میں کورونا وائرس کا ایک ویریئنٹ پایا گیاہے جو بچوں کے لئے نقصان دہ ہے اور وہ ہندوستان میں تیسری لہر کا باعث بن سکتا ہے،بے بنیاد ہے اوربد بختانہ ہے۔ سنگاپور کی وزارت خارجہ نے اس پر مایوسی کا اظہار کیا کہ ایک ممتاز سیاسی شخصیت ایسے دعوے کرنے سے پہلے حقائق کی چھان بین کرنے میں ناکام رہی۔
سنگاپور کی وزارت صحت نے بھی کہا ہے کہ کورونا وائرس کے سنگاپور ویرینٔٹ نام کی کوئی چیز نہیں ہے۔ سنگاپور میں حالیہ دنوں میں رپورٹ ہونے والی کورونا کے کیسز میں وائرس کا بی 1.617.2 ورژن ملا ہے جو ہندوستان میں پہلی بار پایا گیا تھا۔
خیال رہے دہلی کے وزیر اعلیٰ اروند کجریوال نے منگل کے روز ایک ٹویٹ میں کہا ’’سنگاپورمیں آنے والی کورونا کی نئی شکل کو بچوں کے لئے بہت خطرناک قرار دیا جارہا ہے ، یہ ہندوستان میں تیسری لہر کی طرح آسکتا ہے‘‘۔ انہوں نے مرکزی حکومت سے مطالبہ کیا کہ سنگاپور کے ساتھ ہوائی خدمات کو فوری طور پر منسوخ کیا جائے اور بچوں کے لئے ویکسین کے متبادل پر ترجیحی بنیادوں پر کام کیا جائے۔

سوشل میڈیا پر ہمارے ساتھ جڑنے کے لیے یہاں کلک کریں۔ Click 👉 https://bit.ly/followRRS