بے گھر اور سڑک کے بچوں کی دیکھ بھال کیلئے کجریوال حکومت 10 کروڑ روپے کی لاگت سے رہائشی اسکول بنائے گی: جسمین شاہ، موجودہ وقت میں بچوں کے استحصال کا شدید خطرہ: کنڈو
نئی دہلی (ایس این بی) : کجریوال حکومت نے اسٹریٹ چلڈرن کی بحالی کے لیے ایک فیلڈ ٹاسک فورس کو تعینات کیا ہے۔ ٹاسک فورس اسٹریٹ چلڈرن کی شناخت اور تعلیمی، مالی اور والدین کی مدد فراہم کرنے پر توجہ دے گی۔ ڈی ڈی سی کے وائس چیئرمین جسمین شاہ نے کہا کہ کجریوال حکومت نے ایک جامع منصوبہ تیار کیا ہے جس کا مقصد دہلی میں بے گھر اور سڑک کے بچوں کی دیکھ بھال کرنا ہے۔ کجریوال حکومت ایسے بچوں کے لیے 10 کروڑ روپے کی لاگت سے ایک رہائشی اسکول بنائے گی۔ جسمین شاہ نے کہا کہ یہ اسکول نہ صرف تعلیم فراہم کرے گا بلکہ کمزور بچوں کو جذباتی اور نفسیاتی مدد بھی فراہم کرے گا۔ اس ٹاسک فورس کو شروع کرنے سے ہم ان بچوں کو تعلیم، مالی امداد اور تحفظ سمیت بنیادی سہولتیں فراہم کر سکیں گے۔ یہ ٹاسک فورس مرحلہ وار شروع کی جائے گی، جس کا آغاز جنوبی اور جنوب مشرقی اضلاع سے ہوگا۔ پروجیکٹ کی فنڈنگ اور حکمت عملی کے پارٹنر یوتھ ریچ نے کہا کہ ہمیں DCPCR کے ساتھ اس اسکیم کا حصہ بننے کا اعزاز حاصل ہے تاکہ سڑک کے بچوں کو ریلیف فراہم کیا جا سکے اور انہیں تعلیم، صحت اور حفاظت تک رسائی فراہم کی جا سکے۔ یہ ٹیم کیس ورکرز اور کونسلرز پر مشتمل ہوگی، جنہیں ضلع وار تعینات کیا جائے گا۔
دہلی کمیشن فار پروٹیکشن آف چائلڈ رائٹس کے چیئرمین انوراگ کنڈو نے کہا کہ ان بچوں کے استحصال کا سنگین خطرہ ہے جو سڑکوں پر بھیک مانگنے، سامان بیچنے اور لال بتیوں میں اپنے دن رات گزارتے ہیں۔انہوںنے مزید کہاکہ دہلی کمیشن فار پروٹیکشن آف چائلڈ رائٹس نے دہلی کے ڈائیلاگ اینڈ ڈیولپمنٹ کمیشن (ڈی ڈی سی ڈی) کے ساتھ مل کر سلام بالک ٹرسٹ اور یوتھ ریچ کے ساتھ مل کر ایک اسکیم شروع کی ہے، جس سے اسٹریٹ چلڈرن کی بحالی کے لیے ایک فیلڈ ٹاسک فورس قائم کی جا سکتی ہے۔ انہوں نے کہا کہ اس جامع طریق کار میں ابتدائی وارننگ سسٹم، DCPCR کی 24×7 ایمرجنسی ہیلپ لائن شامل ہے تاکہ اسٹریٹ چلڈرن کی شناخت، روک تھام اور راحت ملے۔انہوںنے تمام شہریوں سے اپیل کی کہ وہ سڑکوں پر اپنے شب وروز گزارنے والے بچوں کے مستقبل کو محفوظ بنانے کے لیے ہمارا ساتھ دیں۔ اگر ایسے بچے سڑکوں پر نظر آئیں تو ہیلپ لائن نمبر 9311551393 پر اطلاع دیں۔
