شارجہ (یو این آئی) : ایشیا کپ میں پاکستان اور ہانگ کانگ کے درمیان کھیلے گئے مقابلے کو پاکستانی ٹیم نے 155رن سے جیت لیا ہے۔ اسی کے ساتھ یہ طے ہوگیا ہے کہ ہندوستان اور پاکستان کے درمیان ایک اورمقابلہ شائقین کو دیکھنے کو ملے گا یہ میچ 4ستمبر کو کھیلا جائے گا۔
واضح رہے کہ پاکستان نے محمد رضوان (78 ناٹ آؤٹ) کی نصف سنچری کے بعد شاداب خان (4 وکٹ) اور محمد نواز (3 وکٹ) کی مہلک بولنگ کی بدولت ایشیا کپ 2022 میں جمعہ کو ہانگ کانگ کو 155 رنز سے شکست دے کر سپر 4 میں قدم رکھا۔ پاکستان نے ہانگ کانگ کو 20 اوورز میں 194 رنز کا ہدف دیا تھا جس کے جواب میں ہانگ کانگ صرف 38 رنز پر ڈھیر ہو گیا۔ پاکستانی باؤلنگ کی قیادت کرتے ہوئے شاداب نے 2.4 اوورز میں آٹھ رن دے کر چار جبکہ نواز نے دو اوورز میں پانچ رن کے عوض تین وکٹیں حاصل کیں۔ ہانگ کانگ نے ٹاس جیت کر باؤلنگ کا فیصلہ کیا اور پاکستانی کپتان بابر اعظم نو رنز بنا کر پویلین لوٹ گئے ۔ اس کے بعد رضوان اور فخر زمان کی جوڑی نے دوسری وکٹ کے لیے 115 رنز جوڑے اور پاکستان کو مضبوط پوزیشن میں پہنچا دیا۔ رضوان نے 57 گیندوں پر چھ چوکوں اور ایک چھکے کی مدد سے 78 رنز کی ناٹ آؤٹ اننگز کھیلی جبکہ زمان نے 41 گیندوں پر تین چوکوں اور دو چھکوں کی مدد سے 53 رنز بنائے ۔ اننگز کے 17ویں اوور میں زمان کی وکٹ گرنے کے بعد خوشدل کریز پر آئے ، انہوں نے 233.33 کے اسٹرائیک ریٹ سے 15 گیندوں پر 35 رنز بنائے ۔ خوشدل نے محمد اعجاز کے ذریعہ ڈالے گئے 20ویں اوور میں چار چھکے لگائے ، جس کی بدولت پاکستان نے اپنے 20 اوورز میں 193 رنز بنائے ۔ پاکستان کی دونوں وکٹیں احسان خان نے حاصل کیں جب کہ دیگر بولرز نے مایوس کیا۔ 193 رنز کے ہدف کے تعاقب میں ہانگ کانگ کی ٹیم تاش کے پتوں کی طرح بکھر گئی۔ نزاکت خان کی ٹیم کے پاس شاداب اور نواز کی اسپن کا کوئی جواب نہیں تھا۔ نسیم خان نے تیسرے اوور میں کپتان نزاکت (08) اور بابر حیات (صفر) کو آؤٹ کیا جس کے بعد شاہنواز دہانی نے پانچویں اوور میں یاسم مرتضیٰ (02) کو پویلین بھیج دیا۔ اس کے بعد شاداب اور نواز نے بولنگ کا مورچہ سنبھالا اور اگلے پانچ اوورز میں بقیہ بلے بازوں کو پویلین لوٹا دیا۔ ہانگ کانگ کا کوئی بھی کھلاڑی 10 رنز کا ہندسہ بھی نہ چھو سکا اور پوری ٹیم 10.4 اوورز میں 38 رنز پر آل آؤٹ ہوگئی۔ پاکستان کی 155 رنز کی جیت ٹی۔ٹوئنٹی انٹرنیشنل میں رنز کے لحاظ سے دوسری سب سے بڑی جیت ہے ۔ 38 رنز ہانگ کانگ کا ٹی۔ٹوئنٹی انٹرنیشنل میں بنایا گیا سب سے کم اسکور ہے ۔ اس کے علاوہ یہ پاکستان کے خلاف کسی بھی ٹیم کا سب سے کم اسکور ہے۔
اس زبردست جیت کے ساتھ پاکستان نے سپر 4 میں جگہ بنا لی ہے جہاں اس کا مقابلہ اتوار کو ہندوستان سے ہوگا۔ یہ انتہائی متوقع میچ دبئی انٹرنیشنل کرکٹ اسٹیڈیم میں کھیلا جائے گا۔
