منیلا (یواین آئی) : دو بار کی اولمپک تمغہ جیتنے والی پی وی سندھو نے جمعہ کو چین کی ہی بنگ ژاؤ پر سنسنی خیز جیت کے ساتھ بیڈمنٹن ایشیا چیمپئن شپ (بی اے سی) کے خواتین کے سنگلز سیمی فائنل میں داخلہ حاصل کرلیا۔ اس جیت کے ساتھ ہی سندھو نے اس چمپئن شپ میں اپنا تمغہ یقینی بنا لیا ہے ۔ یہ ٹورنامنٹ کووڈ-19 کی وبا کی وجہ سے دو سال کے وقفے کے بعد کھیلا جا رہا ہے ۔
چوتھی سیڈ سندھو نے 2014 کے گیمچیون مرحلے میں کانسی کا تمغہ جیتا تھا، انہوں نے ایک گھنٹہ 16 منٹ تک چلے کوارٹر فائنل میں پانچویں سیڈ چین کی کھلاڑی کو 21-9، 13-21، 21-19 سے شکست دی۔ دنیا کے ساتویں نمبر کی کھلاڑی سندھو کا میچ پہلے بنگ ژاؤ کے خلاف جیت کا ریکارڈ سات۔نو تھا جنہیں وہ پچھلے دو مقابلوں میں شکست دے چکی ہیں۔ سندھو نے بغیر وقت ضائع کیے پہلے گیم میں 11-2 کی برتری حاصل کی اور پھر 1-0 کی برتری کے لیے میچ پر غلبہ برقرار رکھا۔ تاہم بنگ ژاؤ نے دوسرے گیم میں شاندار واپسی کرتے ہوئے 6-4 کی برتری کو 11-10 تک بڑھا دیا۔ وقفے کے بعد چینی کھلاڑی نے لگاتار پانچ پوائنٹس حاصل کر کے 19-12 کی برتری حاصل کر کے میچ 1-1 سے برابر کر دیا۔فیصلہ کن میچ میں دونوں کھلاڑی 2-2 سے برابر تھیں لیکن سندھو نے اپنے کراس کورٹ سمیش سے پوائنٹس جمع کئے اور بریک تک 11-5 کی برتری حاصل کی۔ بنگ ژاؤ نے حالانکہ بریک کے بعد واپسی کی اور سندھو کی سبقت کو کم کردیا۔ سندھو ایک وقت 15-9 سے آگے تھیں لیکن 16-15 تک پہنچنے میں اپنی رفتار کھو بیٹھیں۔ سندھو اس وقت 18-16 سے آگے تھیں اور چار میچ پوائنٹس حاصل کرکے میچ جیت کر سیمی فائنل میں داخلہ حاصل کرلیا۔
