نئی دہلی (ایجنسی) دہلی جی ٹی کرنال روڈ پر واقع ایک شادی ہال میں اچانک چار افراد لفٹ کے اندر پھنس گئے جنہیں فائر بریگیڈ کے عملے کی مدد سے بچا لیا گیا ہے۔ فائر ڈپارٹمنٹ کو رات دیر گئے واقعے کی اطلاع ملی۔ جی ٹی کرنال روڈ پر شکتی نگر کے گرین لاؤنج فیشن میرج ہال میں اس وقت اچانک بھگدڑ مچ گئی جب وہاں موجود لوگوں کو معلوم ہوا کہ لفٹ میں 4 افراد پھنس گئے ہیں۔ ان میں دو مرد اور دو خواتین شامل تھیں۔ فائر بریگیڈ کو اطلاع دینے کے بعد شادی ہال میں رات گئے ریسکیو آپریشن شروع کیا گیا اور لفٹ میں پھنسے لوگوں کی جان بچانے کی کوششیں کی گئیں۔ فائر فائٹرز نے لفٹ کے اوپری حصے کو کاٹ کر ایک ایک کر کے لوگوں کو باہر نکالا۔
تقریباً 4 گھنٹے تک جاری رہنے والے اس آپریشن کی ایک ویڈیو بھی منظر عام پر آئی ہے جس میں فائر فائٹرز نے تیز دھار چیز سے کاٹ کر لفٹ کی اوپری سطح کو باہر نکالا۔
فائر بریگیڈ کے اہلکاروں نے جن لوگوں کو بحفاظت باہر نکالا ان میں ستیش کمار (عمر 70 سال)، راج کماری (عمر 67 سال)، ونیش (عمر 36 سال) اور روشن لال (عمر 80 سال) شامل ہیں۔
