نئی دہلی: (یو این آئی) کانگریس نے اتراکھنڈ میں بار بار وزیر تبدیل کیے جانے کی مذمت کرتے ہوئے اسے اتراکھنڈ کے عوام کی توہین قرار دیا اور کہا کہ بھارتیہ جنتا پارٹی (بی جے پی) کی مرکزی قیادت ریاست میں سیاسی عدم استحکام پیدا کر کے لوگوں کے ساتھ دھوکہ کررہی ہے ۔
کانگریس کے اتراکھنڈ کےانچارج دیویندر یادو،سابق وزیر اعلی ہریش راوت،ریاستی صدر پریتم سنگھ اور کانگریس کے شعبہ مواصلات کے سربراہ رندیپ سنگھ سرجے والا نے ہفتے کے روز یہاں پارٹی ہیڈ کوارٹر میں ایک پریس کانفرنس میں کہا کہ بی جے پی آئینی ذمہ داریوں کا حوالہ دے کر ریاست میں سیاسی عدم استحکام پید کر کے اتراکھنڈ کے عوام کو گمراہ کر رہی ہے ۔
یادو نے وزیر اعلی تیرتھ سنگھ راوت کے استعفے کو اتراکھنڈ کے عوام کے ساتھ دھوکا قرار دیا اور کہا کہ ریاست میں بھاری اکثریت کے باوجود بی جے پی کے پاس ریاست کو چلانے کے لئے کوئی ایسا لیڈر نہیں ہے جو وزیر اعلی کی حیثیت سے موثر انداز میں کام کر سکے۔
رندیپ سنگھ سرجے والا نے اس تبدیلی کو اتراکھنڈ کے عوام پر زیادتی ، مظالم اور دھوکہ دہی قرار دیا اور کہا کہ بی جے پی کی مرکزی قیادت اتراکھنڈ کی ترقی کو روک کر ریاست کے عوام کو دھوکہ دے رہی ہے ۔
سابق وزیراعلی ہریش راوت نے بیمار ہونے کی وجہ سے فون پر ہی پریس کانفرنس میں وزیر اعلی کو بار بار تبدیل کرنے کی مشق کو قابل مذمت قراردیا کہا کہ بی جے پی کا اس طرح کا ہائی ڈرامہ ریاست کے عوام کی توہین ہے۔
تیرتھ سنگھ راوت نے کہا کہ بی جے پی کو 2017 میں بھاری اکثریت ملی تھی اور اس کے پاس مرکز اور ریاست میں ڈبل انجن کی حکومت بھی ہے۔ اس کے باوجود ریاست میں ترقی نہیں کی گئی ۔ ان کا کہنا تھا کہ بی جے پی حکومت نے اتراکھنڈ میں کسی بھی مسئلے کو حل نہیں کیا ہے اور مضحکہ خیز طریقے سے وزیر اعلی تبدیل کرتی رہی ہے۔
ریاستی صدر پریتم سنگھ نے کہا کہ بی جے پی کے دور حکومت میں ریاست میں کوئی ترقیاتی کام نہیں ہوا ہے اور حکومت لوگوں کی توجہ ہٹانے کی کوشش کر رہی ہے اوراب آئینی ذمہ داری کا حوالہ دیتے ہوئے وزیر اعلی کو تبدیل کیا جارہا ہے۔ ان کا کہنا تھا کہ بی جے پی نے اقتدارمیں آنے سے پہلے جو عوام سے وعدوں کئے تھے اسے پورا نہیں کیا اور اب عوام کو گمراہ کرنے کے لئے سیاسی عدم استحکام پیدا کیا جارہا ہے۔ انہوں نے کہا کہ اتراکھنڈ میں خواتین پر مظالم ڈھائے جارہے ہیں اوراقتدار میں مد ہوش بی جے پی کے اسمبلی اراکین پر عصمت دری کے الزام لگ رہے ہیں ، لیکن حکومت ان کے خلاف کوئی قدم نہیں اٹھا رہی ہے۔
