نیدر لینڈ نے زمبابوے کو شکست دے کر سپر 12 میں اپنا کھاتہ کھولا

0

ایڈیلیڈ (یو این آئی) : پال وین میکرن (29/3) کی شاندار گیند بازی اور میکس او ڈاؤڈ (52) کی نصف سنچری کی بدولت نیدرلینڈ نے بدھ کو سپر-12 ٹی 20 ورلڈ کپ 2022 کے میچ میں زمبابوے کو پانچ وکٹوں سے شکست دے دی۔
زمبابوے نے نیدرلینڈ کو 118 رن کا ہدف دیا جسے نیدر لینڈ نے 12 گیندیں باقی رہتے حاصل کر لیا۔
زمبابوے کی جانب سے سکندر رضا نے 24 گیندوں پر تین چوکوں اور تین چھکوں کی مدد سے 40 رن بنائے جبکہ شان ولیمز نے 23 گیندوں میں تین چوکوں کی مدد سے 28 رن بنائے ۔ زمبابوے کا کوئی اور بلے باز ڈبل فیگر کو بھی نہ چھو سکا جس کی وجہ سے پوری ٹیم 19.3 اوور میں 117 رن پر ڈھیر ہو گئی۔
ہدف کا تعاقب کرتے ہوئے نیدر لینڈ کا پہلا وکٹ جلد ہی گرنے کے بعد، اوڈوڈ نے ٹام کوپر کے ساتھ دوسرے وکٹ کے لیے 73 رن کی شراکت داری کے ساتھ ٹیم کو مضبوط پوزیشن میں پہنچا دیا۔ نیدرلینڈز نے اگلے چار وکٹ 26 رن کے وقفے سے گنوا دیئے ، لیکن چھوٹے ہدف کی وجہ سے اسے جیت حاصل کرنے میں زیادہ پریشانی نہیں ہوئی۔ ٹورنامنٹ کے سپر 12 مرحلے میں چار میچوں میں نیدرلینڈز کی یہ پہلی جیت ہے ۔ دوسری جانب زمبابوے کی ٹیم چار میچوں میں دوسری شکست کے ساتھ سیمی فائنل کی دوڑ سے باہر ہوگئی ہے ۔
زمبابوے نے ٹاس جیت کر بیٹنگ کا فیصلہ کیا لیکن اس کا آغاز اچھا نہیں رہا۔ وین میکرین اور برینڈن گلوور کی شاندار گیندبازی نے زمبابوے کو 20 رن پر تیز دھچکا دیا۔ ولیمز اور رضا نے چوتھی وکٹ کے لیے 48 رن کی شراکت قائم کی لیکن ولیمز کے آؤٹ ہوتے ہی وکٹ گرنے کا سلسلہ دوبارہ شروع ہوگیا۔ زمبابوے آخری چھ وکٹوں پر صرف 49 رن کا اضافہ کرسکا اور 19.2 اوور میں 117 رن پر آل آؤٹ ہوگئی۔
ہالینڈ کی جانب سے وین میکرن نے تین وکٹیں حاصل کیں۔ گلوور، لوگن وین بیک اور باس ڈی لیڈ نے دو دو جبکہ فریڈ کلاسن نے ایک وکٹ حاصل کی۔

سوشل میڈیا پر ہمارے ساتھ جڑنے کے لیے یہاں کلک کریں۔ Click 👉 https://bit.ly/followRRS