فیفا ورلڈکپ قطرمیں رنگا رنگ آغاز

0

دنیا بھر سے 32 ٹیمیں فٹبال چمپئن شپ کا تاج سجانے کےلئے مد مقابل ہوں گی
دوحہ(اجنساں) : قطر میں فیفا ورلڈکپ 2022 کا آغاز ہوگےاہے۔ ایونٹ میں 32 ٹیموں کے درمیان 64 میچز کھیلے جائیں گے۔ رپورٹ کے مطابق دنیا بھر سے 32 ٹیمیں فٹبال چمپئن شپ کا تاج سجانے کے لیے مد مقابل ہوں گی۔ایونٹ کی افتتاحی تقریب میں موسیقی کا تڑکا بھی لگے گا جبکہ آتش بازی کا مظاہرہ بھی کیا جائے گا۔ تقریب کے بعد ایونٹ کا پہلا افتتاحی میچ میزبان ٹیم قطر اور ایکواڈور کی ٹیموں کے درمیان ہوگا۔فیفا کی جانب سے جاری اعلامیے کے مطابق ایونٹ کی فاتح ٹیم کو 42 ملین ڈالرز کی رقم دی جائے گی۔فٹبال کی عالمی تنظیم فیفا کے مطابق رواں سال ہونے والے ایونٹ میں اخراجات کے تمام ریکارڈ ٹوٹ گئے، میگا ایونٹ کا تخمینہ 220 ارب ڈالرز سے زائد متوقع ہے۔
قطر میں 64 میچز کیلیے 6 سے 10 ارب ڈالرز کی لاگت سے 8 شاندار اسٹیڈیمز تعمیر کیے گئے ہیں۔قطر انتظامیہ نے اسٹیڈیمز کے اندر شراب کی فروخت اور شائقین کے مختصر لباس پہننے پر بھی پابندی عائد کی ہے، جس کی خلاف ورزی پر جرمانہ یا جیل ہوگی جبکہ اسٹیڈیم میں گندگی پر 400 سے دو ہزار یورو تک جرمانہ ہوگا۔ انتظامیہ نے شائقین کی نگرانی کے لیے 15 ہزار جدید خفیہ کیمرے نصب اور کنٹرول روم قائم کیا ہے۔فیفا ورلڈکپ میں پاکستان کی ٹیم رواں سال بھی حصہ نہیں مگر پاکستان کے لیے اعزاز کی بات یہ ہے کہ پاکستان کے علاقے سیالکوٹ میں تیار کردہ فٹبال ’الریحلہ‘ تمام میچز میں استعمال ہوگی۔فیفا کے بینر تلے اب تک 20 ورلڈکپ کا انعقاد ہوچکا ہے جن میں سے 11 بار میزبانی یورپ نے کی جبکہ جنوبی امریکا پانچ، شمالی امریکا تین اور افریقا ایک بار میزبانی کا اعزاز حاصل کیا، رواں سال ہونے والا یہ اکیسواں ورلڈکپ ہے جس کی میزبانی پہلی بار مشرق وسطیٰ کے حصے میں آئی ہے۔رواں سال کا ورلڈکپ اس لیے بھی منفرد ہے کہ اس بار ایونٹ کا انعقاد سردی کے موسم میں ہورہا ہے۔

سوشل میڈیا پر ہمارے ساتھ جڑنے کے لیے یہاں کلک کریں۔ Click 👉 https://bit.ly/followRRS