ویانا: آسٹریا کی وزارت خارجہ نے گزشتہ دو دنوں میں اپنے ملک کے 430 سے زیادہ شہریوں کو اسرائیل سے نکال دیا ہے۔ حماس اور اسرائیل کے درمیان جنگ چھڑنے کے باعث آسٹریا کے شہریوں نے وطن واپسی کی خواہش کا اظہار کیا تھا۔
وزارت خارجہ نے سوشل میڈیا ایکس پر کہا کہ وزارت خارجہ کے آپریشن کے تحت اسرائیل سے انخلاء کی آخری پرواز اپنے شہریوں کو لے کر آج ویانا پہنچی۔ 48 گھنٹے میں ہم نے 430 سے زائد افراد کو بحران کے علاقے سے نکال کر گھروں کو پہنچایا ہے۔
اسرائیل سے نکالے گئے آسٹریا کے شہریوں کو لے کر پہلا طیارہ جمعرات کی دو پہر ویانا پہنچا، جس میں 176 افراد سوار تھے۔ خیال کیا جا رہا تھا کہ ان شہریوں کو بدھ کے روز ایک فوجی طیارے کے ذریعے نکالا جانا تھا لیکن تکنیکی خرابی کے باعث یہ ٹیک آف نہیں ہو سکا۔
قابل ذکر ہے کہ 7 اکتوبر کو حماس نے غزہ کی پٹی سے اسرائیل کے خلاف بڑے پیمانے پر راکٹ حملہ کیا تھا، جس سے اسرائیل کو اگلے دن حالت جنگ کا اعلان کیا تھا۔
مزید پڑھیں: رائٹرز نے اسرائیلی سرحد کے قریب اپنے صحافی عصام عبداللہ کی ہلاکت کی تصدیق کی
اسرائیل نے 9 اکتوبر کو 20 لاکھ سے زیادہ آبادی والے غزہ کی پٹی کی مکمل ناکہ بندی کرنے کا حکم دیا اور پانی، خوراک و ایندھن کی سپلائی منقطع کر دی۔ اس جنگ کی وجہ سے اسرائیل اور فلسطین دونوں طرف سے ایک ہزار سے زائد ہلاکتوں اور ہزاروں کے زخمی ہونے کی اطلاعات ہیں۔
