نئی دہلی(ایجنسیاں): سابق ہندوستانی اسٹار کرکٹر امباتی رائیڈو نے کرکٹ کی دنیا کو الوداع کہنے کے بعد اب سیاست میں قدم رکھ دیا ہے۔ رائیڈو نے آندھرا پردیش کی پارٹی یوواجنا سریکا ریتھو کانگریس پارٹی (وائی ایس آر سی پی) میں شمولیت اختیار کی ہے۔ آندھرا پردیش کے چیف منسٹر وائی ایس جگن موہن ریڈی نے رائیڈو کا اپنی پارٹی میں خیرمقدم کیا ہے۔ آپ کو بتاتے چلیں کہ رائیڈو نے پہلے انٹرنیشنل کرکٹ سے ریٹائرمنٹ لے لی تھی اور پھر آئی پی ایل سے بھی ریٹائرمنٹ لے لی تھی۔ کرکٹ کو مکمل طور پر خیرباد کہنے کے بعد اب کھلاڑی نے سیاست میں آنے کا فیصلہ کر لیا ہے۔
آپ کو بتا دیں کہ امباتی رائیڈو نے اس سال جون کے مہینے میں آندھرا پردیش کے سی ایم جگن ریڈی سے ملاقات کی تھی۔ تب سے یہ قیاس آرائیاں کی جارہی تھیں کہ رائیڈو آندھرا پردیش کی پارٹی وائی ایس آر سی پی میں شامل ہوسکتے ہیں۔ اب یہ قیاس آرائیاں حقیقت میں بدل گئی ہیں۔ رائیڈو نے وائی ایس آر سی پی میں شمولیت اختیار کی ہے۔ آندھرا پردیش کے وزیر اعلیٰ بھی چاہتے تھے کہ رائیڈو اگلے لوک سبھا انتخابات میں حصہ لیں۔ ابھی تک یہ طے نہیں ہوا ہے کہ رائیڈو کس لوک سبھا سیٹ سے الیکشن لڑیں گے، لیکن اگر رپورٹوں پر یقین کیا جائے تو وائی ایس آر سی پی مچلی پٹنم لوک سبھا سیٹ سے رائیڈو کو میدان میں اتار سکتی ہے۔ آپ کو بتاتے چلیں کہ وائی ایس آر سی پی پارٹی 12 مارچ 2011 کو بنائی گئی تھی۔ تب سے اس پارٹی نے آندھرا پردیش میں اپنی الگ شناخت بنائی ہے۔ یہ ایک بہت مضبوط مقامی جماعت ہے۔
سابق ہندوستانی اسٹار بلے باز امباتی رائیڈو نے کل 55 ون ڈے میچ کھیلے ہیں۔ اس دوران ان کے بلے سے 1694 رنز بن چکے ہیں۔ انہوں نے ون ڈے کرکٹ میں 3 سنچریاں اور 10 نصف سنچریاں بھی بنائی ہیں۔ اس کے علاوہ رائیڈو کو ٹیسٹ کرکٹ کھیلنے کا موقع نہیں ملا، تاہم انہوں نے 6 ٹی ٹوئنٹی میچز کھیلے ہیں، جس میں وہ اپنے بلے سے صرف 42 رنز ہی بنا سکے۔
مزید پڑھیں: بی جے پی کو اقتدار سے ہٹا کر ملک کو برباد ہونے سے بچانا ضروری
رائیڈو کا طویل ترین کیریئر آئی پی ایل میں رہا ہے۔ رائیڈو نے آئی پی ایل میں 203 میچ کھیلے ہیں جس میں انہوں نے 4348 رنز بنائے ہیں۔ رائیڈو نے آئی پی ایل میں بھی سنچری بنائی ہے۔
