نئی دہلی(ایجنسیاں) :ٹی ٹوئنٹی ورلڈکپ 2022میں ہندوستان کے سفر کا اختتام ہوگیا ہے۔ ٹیم انڈیا سیمی فائنل میں انگلینڈ کے ہاتھوں 10وکٹوں کی بدترین شکست کے ساتھ ٹورنامنٹ سے رخصت ہوئی۔ اس میچ کے بعد ٹیم تنقیدوں کی زد میں ہے۔ سوشل میڈیا پر بھی بڑا ہنگامہ ہے اور امکان ظاہر کیا جارہا ہے کہ جلد ہی کئی سینئر کھلاڑی اپنے کیریئر کو خیر باد کہہ دیں گے جبکہ روہت شرما کی کپتانی جانے کی بھی باز گشت سنائی دے رہی ہے اور ان کی جگہ ہاردک پانڈیا کو ٹیم کی قیادت سونپی جاسکتی ہے۔ مشن ورلڈکپ کی ناکامی کے بعد اب ٹیم انڈیا نیوزی لینڈ کا دورہ کرے گی۔ تین ٹی ٹوئنٹی اور تین ون ڈے میچوں کی سیریز کا آغاز 18نومبر سے شروع ہوگا۔
ٹیم انڈیا کے سینئر کھلاڑیوں کو نیوزی لینڈ کے دورے کے لیے آرام دیا گیا ہے۔ خبر رساں ایجنسی پی ٹی آئی کے مطابق اب اس سیریز کے لیے ہیڈ کوچ راہل ڈراوڑ کو بھی آرام دیا گیا ہے۔ ان کی جگہ نیشنل کرکٹ اکیڈمی کے ڈائریکٹر اور سابق تجربہ کار بلے باز وی وی ایس لکشمن ٹیم انڈیا کے قائم مقام ہیڈ کوچ کی ذمہ داری سنبھالیں گے۔
رپورٹ کے مطابق، ڈراوڑ کے ساتھ ساتھ ان کے پورے کوچنگ اسٹاف کو ٹی ٹوئنٹی ورلڈ کپ کے بعد آرام دیا گیا ہے۔ اس میں بولنگ کوچ پارس میمبرے اور بیٹنگ کوچ وکرم راٹھور بھی شامل ہیں۔ ہندوستانی ٹیم تین ٹی ٹوئنٹی میچوں کی سیریز کا پہلا میچ 18 نومبر کو ویلنگٹن میں کھیلے گی۔ اس سیریز کے لیے روہت شرما، ویراٹ کوہلی، کے ایل راہل اور اشون جیسے کھلاڑیوں کو آرام دیا گیا ہے۔ اس کے علاوہ اب چیف کوچنگ سٹاف بھی اس دورے سے باہر ہو جائے گا۔
بی سی سی آئی کے ایک ذرائع نے پی ٹی آئی کو بتایا’’ نیشنل کرکٹ اکیڈمی ٹیم لکشمن کی قیادت میں نیوزی لینڈ میں ٹیم میں شامل ہوگی۔ ان میں ایکٹنگ بیٹنگ کوچ کے طور پر ہرشی کیش کانیتکر اور ایکٹنگ بولنگ کوچ کے طور پر سائراج بہولے شامل ہیں‘‘۔ یہ پہلا موقع نہیں ہے جب لکشمن ٹیم انڈیا کے کوچ کا عہدہ سنبھالیں گے۔ اس سے قبل وہ زمبابوے اور آئرلینڈ کے دورے پر ٹیم انڈیا کے کوچ بھی رہ چکے ہیں۔ حال ہی میں، وہ جنوبی افریقہ کے خلاف گھریلو ون ڈے سیریز میں بھی ٹیم انڈیا کے ساتھ تھے۔
ہاردک پانڈیا نیوزی لینڈ کے دورے پر ٹی 20 سیریز میں ٹیم انڈیا کی کپتانی کریں گے۔ اس کے ساتھ ہی شیکھر دھون ون ڈے سیریز میں کپتان ہوں گے۔ روہت شرما سمیت دیگر تجربہ کار کھلاڑی اگلے ماہ بنگلہ دیش کے دورے پر ٹیم انڈیا میں واپس آئیں گے۔ ٹیم انڈیا بنگلہ دیش کے دورے پر تین ون ڈے اور دو ٹیسٹ میچوں کی سیریز کھیلے گی۔ یہ 4 دسمبر سے شروع ہوگا۔ انگلینڈ کے خلاف شکست کے بعد ہندوستانی کھلاڑیوں نے واپسی شروع کردی ہے۔ کوہلی ایڈیلیڈ سے پہلے ہی روانہ ہو چکے ہیں۔ ساتھ ہی روہت اور راہل بھی جلد ہی ہندوستان روانہ ہوں گے۔
نیوزی لینڈ کے خلاف ٹی 20 سیریز کے لیے ٹیم انڈیا: ہاردک پانڈیا (کپتان)، رشبھ پنت (نائب کپتان اور وکٹ کیپر)، شبمن گل، ایشان کشن، دیپک ہڈا، سوریہ کمار یادو، شریاس ایر، سنجو سیمسن (ڈبلیو کے)، واشنگٹن سندر، یوزویندر چاہل، کلدیپ یادو، ارشدیپ سنگھ، ہرشل پٹیل، محمد سراج، بھونیشور کمار، عمران ملک۔
نیوزی لینڈ کے خلاف ون ڈے سیریز کے لیے ٹیم انڈیا: شیکھر دھون (کپتان)، رشبھ پنت (نائب کپتان اور وکٹ کیپر)، شبمن گل، دیپک ہڈا، سوریہ کمار یادو، شریاس آئیر، سنجو سیمسن (وکٹ)، واشنگٹن سندر، شاردول ٹھاکر، شہباز احمد، یوزویندر چاہل، کلدیپ یادو، ارشدیپ سنگھ، دیپک چاہر، کلدیپ سین، عمران ملک۔
