قیادت کوئی بھی ہو، ہمیشہ خوشحال پاکستان کو امریکی مفادکیلئے اہم سمجھا: وہائٹ ہاؤس

واشنگٹن(ایجنسیاں) : مسلم لیگ (ن) کے صدرشہباز شریف کے وزیراعظم منتخب ہونے پر امریکہ کا ردعمل سامنے آگیا ہے۔فرانسیسی خبر رساں ایجنسی ( اے ایف پی ) کے مطابق شہباز شریف کے وزیر اعظم منتخب ہونے کے چند گھنٹے بعد وائٹ ہاؤس کی پریس سیکرٹری جین ساکی نے اپنے ایک بیان میں کہا کہ ‘ ایک جمہوری پاکستان امریکہ کے مفادات کے لیے اہم ہے۔خبررساں ایجنسی کے مطابق وہائٹ ہاؤس میں ایک پریس بریفنگ میں ساکی نے کہا کہ ‘ہم آئینی جمہوری اصولوں کی پرامن عملدرآمد کی حمایت کرتے ہیں۔وہائٹ ہاؤس کی پریس سیکرٹری نے مزیدکہا کہ امریکہ یقینی طور پر قانون کی حکمرانی اور قانون کے تحت مساوی انصاف کے اصولوں کی حمایت کرتا ہے۔ساکی نے مزید کہا کہ امریکہ پاکستان کے ساتھ اپنے دیرینہ تعاون کو قدر کی نگاہ سے دیکھتا ہے اور اس نے ہمیشہ ایک خوشحال اور جمہوری پاکستان کو امریکی مفادات کے لیے اہم سمجھا ہے ،خواہ قیادت کوئی بھی ہو اس میں کوئی تبدیلی نہیں آتی۔خبررساں ایجنسی کے مطابق پریس بریفنگ میں ساکی سے ایک سوال کیا گیا کہ کیا بائیڈن شہباز شریف کو فون کریں گے؟ جس کا جواب دیتے ہوئے انہوں نے کہا کہ مستقبل میں فون کالز کے لحاظ سے، میرے پاس اس وقت کہنے کیلئے کچھ نہیں ہے۔
واضح رہے کہ قومی اسمبلی نے مسلم لیگ ن کے صدر شہباز شریف کو نیا قائد ایوان منتخب کرلیا جس کے بعد شہباز شریف پاکستان کے 23 ویں وزیراعظم منتخب ہوگئے۔خیال رہے کہ نئے قائد ایوان کے لیے متحدہ اپوزیشن کی جانب سے شہباز شریف اور تحریک انصاف کی جانب سے شاہ محمود قریشی وزیراعظم کے امیدوار تھے تاہم پی ٹی آئی کی جانب سے بائیکاٹ کے بعد شہباز شریف واحد امیدوار رہ گئے تھے۔