نئی دہلی: مرکز کے زرعی قوانین کے خلاف احتجاج کرنے والے ہریانہ کے کسانوں نے الزام لگایا ہے کہ بی جے پی رکن پارلیمنٹ نایاب سینی کی کار نے امبالا میں احتجاج کرنے والے کسانوں کو روندنے کی کوشش کی،جس کے سبب ایک کسان زخمی ہوگیا ہے۔ زخمی کسان کو امبالہ کے قریب نارائن گڑھ کے ایک سرکاری اسپتال میں داخل کرایا گیا ہے،جہاں مبینہ واقعہ پیش آیا۔ بی جے پی کے لوک سبھا رکن پارلیمنٹ نایاب سینی کوروشیتر پارلیمانی سیٹ سے نمائندگی کرتے ہیں۔ پارٹی کے دیگر قائدین کووڈ 19 سے لڑنے والے طبی اور فرنٹ لائن ورکرز کو مبارکباد دینے کے لیے ایک تقریب میں شرکت کے لیے امبالہ گئے تھے۔ کسان وہاں جمع ہوئے تھے تاکہ سینی کے دورے کے خلاف احتجاج کریں۔
جیسے ہی پروگرام ختم ہوا اور کاروں کا قافلہ علاقے سے باہر نکلنے لگا۔ گاڑیوں میں سے ایک نے مبینہ طور پر ایک کسان کو ٹکر ماری۔ کسانوں کا ایک بڑا گروپ بی جے پی لیڈروں کے دورے کے خلاف سائیں بھون کے باہر جمع ہوا تھا۔ یہ واقعہ یوپی کے لکھیم پور کھیری میں آٹھ افراد کی ہلاکت کے پانچ دن بعد سامنے آیا ہے۔ جہاں کاروں کا ایک قافلہ کسانوں سے ٹکرا گیا۔جس سے چار افراد ہلاک ہوئے۔ اس کے بعد تشدد میں چار دیگر افراد سمیت کل آٹھ افراد ہلاک ہوئے۔ الزام ہے کہ کسانوں کو روندنے والی گاڑی مرکزی وزیر اجے مشرا کی تھی اور مبینہ طور پر ان کے بیٹے آشیش مشرا چلا رہے تھے۔ لکھیم پور کھیری میں ، یہ کار کسانوں کے ہجوم سے ٹکرا گئی جب وہ پرامن مظاہرہ کر رہے تھے۔ لکھیم پور کیس میں ابھی تک کوئی ملزم گرفتار نہیں ہوا ہے۔ اس پر سیاست گرم ہے۔
