کولکتہ 🙁 یواین آئی) کورونا کی دوسری لہر کے درمیان مغربی بنگال میں اسمبلی انتخابات کے آٹھویں اور آخری مرحلے کے لئے
جمعرات کی صبح 7 بجے سے ریاست کی 294 سیٹوں میں سے 35 سیٹ پر ووٹنگ شروع ہو گئی ہے ۔ جو شام کے ساڑھے چھ
بجے تک جاری رہے گی ۔
بنگال میں آخری مرحلے میں چار اضلاع مالدہ ، کولکتہ شمالی ، مرشد آباد اور ویربھوم کی 35 اسمبلی سیٹوں کے لئے آج پر امن
طریقے سے پولنگ شروع ہو گئی ہے ، جن میں ویربھوم اور مرشد آباد کی 11۔11 ، کولکتہ شمالی کی سات اور مالدہ کی چھ سیٹوں
پر پولنگ ہو رہی ہے۔ ریاست میں آخری مرحلے میں 35 خواتین امیدواروں سمیت کل 283 امیدواروں کی قسمت کا فیصلہ ہو گا ۔
ان امیدواروں کی قسمت کا فیصلہ 53،55،835 مرد ، 41،21،735 خواتین ووٹر اور 158 ٹرانسجینڈرووٹروں سمیت
84،77،728 ووٹر کریں گے ۔ ووٹنگ کے لئے کل 11،860 پولینگ مراکزقائم گئے ہیں۔
ریاست میں حکمران جماعت ترنمول کانگریس کی کارکردگی پر سب کی نگاہیں ہیں کیونکہ ان انتخابات میں فیصلہ ہو گا کہ وزیر اعلیٰ
اور ترنمول کی سربراہ ممتا بنرجی 2 مئی کو ووٹوں کی گنتی کے بعد تیسری مدت کار کے لئے واپس آسکیں گی یا نہیں۔ تاہم مرکز
میں برسراقتدار بھارتیہ جنتا پارٹی نے محترمہ بنرجی کو اس مرتبہ اقتدار سے بے دخل کرنے میں کوئی کسر نہیں چھوڑی ہے۔
ریاست میں آٹھویں مرحلے کے لئے آزادانہ اور غیرجانبدارانہ انتخابات کے انعقاد کے لئے مرکزی فورسز کی 641 کمپنیاں تعینات
کی گئیں ہیں ۔ جن میں سے 224 ضلع ویربھوم ، 212 مرشد آباد ، 110 مالدہ اور 95 شمالی کولکاتہ میں تعینات کی گئی ہیں ۔
ہجوم سے بچنے کے لئے ہر بوتھ میں صرف 1000 ووٹر ووٹ ڈال سکیں گے۔
اس سے قبل الیکشن کمیشن نے ریاست میں روڈ شو اور گاڑیوں کی ریلی پر پابندیاں عائد کردی تھیں ۔ اس کے علاوہ 500 سے زائد افراد کے جلسہ عام پر بھی پابندی عائد کردی گئی تھی اور انتخابی مہم کے اوقات پر پابندی لگا دی گئی تھی اور آخری تین مراحل میں انتخاب کے اختتام کی مدت 48 گھنٹوں سے بڑھا کر 72 کردی گئی تھی۔
الیکشن کمیشن نے کووڈ 19 کے بڑھتے ہوئے کیسز کے مدِ نظر دو مئی کو پانچ ریاستوں میں ووٹوں کی گنتی کے بعد جیت کا جشن منانے پر پابندی عائد کردی ہے۔
ترنمول کانگریس ویر بھوم کے ضلع صدر انوبرت مونڈل کو جمعہ کی صبح سات بجے تک الیکشن کمیشن کی کڑی نگرانی میں رکھا گیا ہے۔ پارٹی لیڈ کو 2019 کے لوک سبھا انتخابات اور 2016 کے اسمبلی انتخابات کے دوران بھی اسی طرح کی نگرانی میں رکھا گیا تھا۔
اس مرحلے میں اپنی قسمت آزما رہے اہم امیدواروں میں ریاست کی اطفال و خواتین کی ترقی کی وزیر ششی پنجا ہیں ، جن کا شیام پکور سیٹ پر مقابلہ بی جے پی کے سندیپن وشواس اور اے آئی ایف بی کے جیون پرکاش سہا سے ہے ۔
اس کے علاوہ کاشی پور- بیلگچھیا سیٹ پر ترنمول کے اتین گوش کا مقابلہ بی جے پی کے شیواجی سنہا رائے اور مارکسی کمیونسٹ پارٹی کے پرتیپ داس گپتا سے ہے۔
