لکھنؤ / نئی دہلی (ایجنسیاں): سماجوادی پارٹی (ایس پی) کے سربراہ اکھلیش یادو نے کانگریس کیلئے لوک سبھا سیٹوں کا آفر بڑھا دیا ہے۔ اب اکھلیش یادو کی جانب سے کانگریس کو 17 سیٹوں کی پیشکش کی گئی ہے۔ سماجوادی پارٹی کے ذرائع کا کہنا ہے کہ یہ ہماری جانب سے آخری پیشکش ہے۔ اگر کانگریس اس پر راضی ہو جاتی ہے تو اکھلیش یادو راہل گاندھی کے ساتھ ’بھارت جوڑو نیائے یاترا‘ میں شامل ہوں گے۔
ایس پی کے چیف ترجمان راجندر چودھری نے بتایا کہ ’ہم نے کانگریس کو 17 لوک سبھا سیٹوں کی حتمی پیشکش کی ہے۔ اس پیشکش پر کانگریس کی منظوری کی بنیاد پر رائے بریلی میں نیائے یاترا میں اکھلیش یادو کا شامل ہونا منحصر کرے گا۔ حالانکہ انہوں نے ان سیٹوں کا نام بتانے سے انکار کیا، جن کی پیشکش کانگریس کو کی گئی ہے۔
— Samajwadi Party (@samajwadiparty) February 19, 2024
دریں اثنا آئندہ لوک سبھا انتخابات کے پیش نظر سماج وادی پارٹی نے اتر پردیش میں مزید 11 سیٹوں کیلئے امیدواروں کا اعلان کیا ہے۔ فہرست میں ایک نام پر کافی چرچا ہے۔ پارٹی نے مختار انصاری کے بھائی افضال انصاری کو غازی پور سے اپنا امیدوار بنایا ہے۔ اس کے علاوہ اس فہرست کے بعد اب یہ واضح ہو گیا ہے کہ ایس پی اور آر ایل ڈی کے راستے بھی جدا ہو گئے ہیں۔
ایس پی نے جینت چودھری کی پارٹی کو دی گئی مظفر نگر سیٹ کیلئے بھی اپنے امیدوار کا اعلان کر دیا ہے۔
مزید پڑھیں: دلتوں، قبائلیوں اور اونچی ذات کے غریبوں کے ساتھ خوفناک ناانصافی ہو رہی ہے: راہل گاندھی
ایس پی کے لوک سبھا امیدواروں کی پہلی فہرست 30 جنوری کو سامنے آئی تھی، جس میں 16 امیدواروں کے ناموں کا اعلان کیا گیا تھا۔ ایس پی نے اب تک یوپی کی 80 لوک سبھا سیٹوں کیلئے 27 امیدواروں کا اعلان کر دیا ہے۔
