نئی دہلی:پٹرول کی قیمتوں میں مستقل اضافے کا سلسلہ جاری ہے۔ جمعہ کے روز بھی پیٹرول کی قیمت بڑھ گئی ہے۔ ملک کی معاشی راجدھانی ممبئی میں 7 ہفتے بعد پٹرول کی قیمت 80 روپے کے اوپر چلی گئی۔
ملک کے چار میٹرو پولیٹن شہروں دہلی، کولکاتا، ممبئی اور چنئی میں پٹرول کی قیمت میں 15 سے 16 پیسے فی لیٹر کا اضافہ ہو گیا۔ دوسری طرف ڈیزل کی قیمت میں کوئی تبدیلی نہیں ہوئی ہے۔ اُدھر بین الاقوامی بازار میں خام تیل کی قیمت دو مہینے کی اونچی سطح پر بنی ہوئی ہے۔
انڈین آئل کی ویب سائٹ کے مطابق دہلی، کولکاتا، ممبئی اور چنئی میں پٹرول کی قیمت بڑھ کر بالترتیب 74.35 روپے، 77.04 روپے، 80.01 روپے اور 77.29 روپے فی لیٹر ہو گیا ہے۔ چاروں میٹرو پولیٹن شہروں میں ڈیزل کی قیمت بھی بغیر کسی تبدیلی کے بالترتیب 65.84 روپے، 68.25 روپے، 69.06 روپے اور 69.59 روپے فی لیٹر پر بنی ہوئی ہے۔
تیل مارکیٹنگ کمپنیوں نے جمعہ کو دہلی،کولکاتا اور ممبئی میں پٹرول کی قیمت میں 15 پیسے جب کہ چنئی میں 16 پیسے فی لیٹر اضافہ کیا۔ ممبئی میں اس سے پہلے 3 اکتوبر کو پٹرول کی قیمت 80.11 روپے فی لیٹر تھی اور تقریباً سات ہفتے بعد یہ قیمت پھر سے 80 کے پار پہنچ گئی ہے۔
بین الاقوامی بازار میں خام تیل کی قیمت میں دو دنوں کی تیزی کے بعد نرمی کے ساتھ کاروبار چل رہا تھا، حالانکہ قیمت تقریباً دو مہینے کی اونچی سطح پر ہے۔ بنچ مارک خام تیل برینٹ کروڈ کی قیمت 63 ڈالر فی بیرل کے اوپر بنا ہوا ہے۔ بین الاقوامی وعدہ بازار انٹرکانٹی نینٹل ایکسچینج (آئی سی ای) پر برینٹ کروڈ کا جنوری معاہدہ جمعہ کو گزشتہ سیشن سے 0.56 فیصد کی نرمی کے ساتھ 63.61 ڈالر فی بیرل پر بنا ہوا تھا۔ وہیں امریکی لائٹ کروڈ ویسٹ ٹیکساس انٹرمیڈیٹ کے جنوری معاہدہ میں گزشتہ سیشن سے 0.67 فیصد کی نرمی کے ساتھ 58.19 ڈالر فی بیرل پر کاروبار چل رہا تھا۔
