ناگپور(ایجنسیاں): مہاراشٹر کے سابق وزیر نواب ملک، جو منی لانڈرنگ کے مبینہ معاملہ میں 18 ماہ کے لیے جیل میں بند تھے، جمعرات کو نائب وزیر اعلیٰ اجیت پوار کی قیادت میں نیشنلسٹ کانگریس پارٹی (این سی پی) کیگروپ میں شامل ہو گئے۔ پارٹی ذرائع کے مطابق 64 سالہ ملک نے فروری 2022 سے اگست 2023 تک جیل میں وقت گزارا اور فی الحال میڈیکل ضمانت پر باہر ہیں۔
قبل ازیں اجیت پوار نے میڈیا والوں کو بتایا کہ انہوں نے ملک کو فون کر کے ’ناگپور میں خوش آمدید‘ کہا تھا۔ انہوں نے کہا کہ وہ ایک سینئر لیڈر ہیں جو اس طرح کے معاملات پر اپنے فیصلے خود لینے کی صلاحیت رکھتے ہیں۔ جمعرات کی صبح وہ مہاراشٹر لیجسلیچر کے سرمائی اجلاس کے لیے ناگپور گئے اور ودھان بھون کمپلیکس میں اجیت پوار گروپ لیڈر کے دفتر گئے۔انہوں نے مسکراتے ہوئے وہاں کے کئی ایم ایل اے اور دیگر عہدیداروں سے بات چیت کی، ایک دوسرے کو دعا سلام کیا، ہاتھ ملایا اور کچھ لوگوں کی طرف ہاتھ بھی ہلایا۔ وہ تقریباً 2سالوں میں اپنے پہلے قانون ساز اجلاس میں شرکت کے لیے یہاں پہنچے تھے۔اسمبلی اجلاس شروع ہونے کے فوراً بعد ملک کو اسمبلی میں حکمراں پارٹی کی پچھلی قطار میں بیٹھے دیکھا گیا، اس بات کی تصدیق کرتے ہوئے کہ انہوں نے اپنا وزن اجیت پوار کے پیچھے ڈال دیا ہے۔
مزید پڑھیں: تلنگانہ میں ریونت ریڈی سمیت 12 وزرا کی حلف برداری
دوسری طرف، ممبئی اور ناگپور میں این سی پی (شرد پوار) کے سینئر لیڈروں نے اس پیش رفت پر تبصرہ کرنے سے انکار کر دیا اور کہا کہ وہ (ملک) ایک سینئر لیڈر ہیں اور انہوں نے تمام پہلوؤں پر غور کرنے کے بعد ہی اپنا فیصلہ لیا ہوگا۔ اگست میں ان کی ضمانت پر رہائی کے بعد سے، ملک کو شرد پوار اور اجیت پوار کے دونوں گروپوں نے آمادہ کیا تھا لیکن انہوں نے اپنے کارڈ نہیں کھولے تھے، جس کی وجہ سے قیاس آرائیوں کا گرم بازار گرم ہوا، جو اب ختم ہو گیا
