نئی دہلی (ایجنسی):دارالحکومت دہلی میں بننے والے سنٹرل وسٹا پروجیکٹ کی زد میں پانچ مساجد اور ایک مقبرہ آئے گا۔ دہلی وقف بورڈ نے دہلی ہائی کورٹ سے اپیل کی ہے کہ انہیں بچایا جائے۔ عدالت نے اس منصوبے کو روکنے سے انکار کر دیا ہے۔یہ مساجد اور مقبرے 100 سال سے زیادہ پرانے ہیں۔ ان میں مسجد ضابطہ گنج، مسجد سنہری باغ، جامع مسجد ریڈ کراس روڈ ، مسجد کرشی بھون،مسجد نائب صدارتی محل اور مزارسنہری باغ شامل ہیں۔ دہلی وقف بورڈ نے عدالت میں دائر درخواست میں کہا ہے کہ یہ موجودہ عبادت گاہیں ہیں،لوگوں کے جذبات سے متعلق ہیں اور یہ ضروری ہے کہ یہ واضح کیا جائے کہ ان کا مستقبل کیا ہوگا۔
اس معاملے پر اگلی سماعت 29 ستمبر کو ہوگی۔ جسٹس سنجیو سچدیو نے کہا کہ سینٹرل وسٹا پراجیکٹ پرروک لگانا ممکن نہیں ہے۔ کیونکہ سپریم کورٹ نے اس کو روکنے سے انکار کر دیا ہے۔ وہ کہنے لگے’ منصوبے کا وقت مقرر ہے،تعمیراتی منصوبہ اپنی جگہ پر ہے، یہ پرانے ڈھانچے ہیں،سب جانتے ہیں،یقینا اس کے لیے کوئی نہ کوئی انتظام ضرور ہوگا۔ جسٹس سنجیو سچدیو،جج،دہلی ہائی کورٹ۔ سینٹرل وسٹا پروجیکٹ کے تحت پارلیمنٹ کی نئی عمارت،نیز وزیراعظم اور نائب صدر کی رہائش گاہیں، کئی وزارتوں کے دفاتر اور مرکزی سیکرٹریٹ بھی تعمیر کی جائیں گی۔
اس منصوبے کے تحت راشٹرپتی بھون سے انڈیا گیٹ تک کے فاصلے تک مکانات تعمیر کیے جائیں گے۔ نارتھ بلاک اور ساؤتھ بلاک کو میوزیم بنایا جائے گا جبکہ موجودہ نائب راشٹرپتی بھون کو مسمار کردیا جائے گا۔ یہ منصوبہ 20 ہزار کروڑ کا ہے۔ وقف بورڈ کی جانب سے پیش ہونے والے سینئر ایڈوکیٹ سجے گھوش نے کہا کہ وہ اس منصوبے کو روکنے کے خواہاں نہیں ہیں۔ اس سے قبل دہلی وقف بورڈ نے ایک درخواست جمع کرائی تھی جس میں کہا گیا تھا کہ وہ صرف یہ چاہتا ہے کہ مذہبی اور تاریخی اہمیت کی عمارتوں کا خیال رکھا جائے،ان کی حفاظت کی جائے۔ بورڈ نے یہ بھی کہا کہ اسے عدالت میں آنا پڑا کیونکہ کئی بار نمائندگی کے باوجود اسے اس حوالے سے کوئی یقین دہانی نہیں ملی۔
