جے پور، (ایجنسیاں): بھجن لال شرما راجستھان کے نئے وزیر اعلیٰ بن گئے ہیں۔ گورنر کلراج مشرنے جے پور کے البرٹ ہال میں منعقدہ ایک تقریب کے دوران بھجن لال شرما کو عہدے اور رازداری کا حلف دلایا۔ دلچسپ بات ہے کہ آج بھجن لال کی سالگرہ بھی ہے۔ بھجن لال کے ساتھ 2 نائب وزرائے اعلیٰ دیا کماری اور پریم چند بیروا نے بھی حلف لیا۔ حلف برداری کی تقریب میں وزیر اعظم نریندر مودی، مرکزی وزیر داخلہ امت شاہ، بی جے پی صدر جے پی نڈا، وزیر دفاع راج ناتھ سنگھ، مرکزی وزرا نتن گڈکری، پیوش گوئل نے شرکت کی۔ اس کے علاوہ یوپی کے وزیراعلیٰ یوگی آدتیہ ناتھ،مدھیہ پردیش کے نئے وزیراعلیٰ موہن یادو، گجرات کے وزیراعلیٰ بھوپیندر پٹیل، مہاراشٹر کے وزیراعلیٰ ایکناتھ شندے، راجستھان کے سابق وزیراعلیٰ اشوک گہلوت، وسندھرا راجے، ارجن رام میگھوال، گوا کے وزیر اعلیٰ پرمود ساونت، تریپورہ کے وزیراعلیٰ مانک شاہ، اتراکھنڈ کے وزیر اعلیٰ پشکر سنگھ دھامی، یوپی کے نائب وزیراعلیٰ کیشو پرساد موریہ سمیت کئی لیڈران نے شرکت کی۔ بھجن لال شرما نے حلف لینے سے پہلے اپنے والدین کا آشیرواد لیا۔ اس سے پہلے وہ مندر گئے اور پوجا ارچنا بھی کی۔
راجستھان میں بی جے پی نے 115 سیٹیں جیتی ہیں۔ وہیں کانگریس کو 69 سیٹیں ملی ہیں۔ ریاست کی 200 میں سے 199 سیٹوں پر ووٹنگ ہوئی۔ ایک نشست پر انتخابات ایک امیدوار کی موت کے باعث ملتوی کر دیے گئے۔ بھجن لال بھرت پور کے رہنے والے ہیں اور پہلی بار ایم ایل اے بنے ہیں۔ پارٹی کے مرکزی مبصرین راج ناتھ سنگھ، سروج پانڈے اور ونود تاؤڑے کی موجودگی میں منگل کو بی جے پی قانون ساز پارٹی کی میٹنگ میں انہیں وزیر اعلیٰ نامزد کیا گیا۔
وسندھرا راجے نے لیجسلیچر پارٹی کی لیڈر کے طور پر ان کا نام تجویز کیا تھا، جبکہ دیا کماری ودیا نگر سے ایم ایل اے ہیں اور بیرواا دودو سیٹ سے ایم ایل اے ہیں۔ اجمیر نارتھ کے ایم ایل اے واسودیو دیونانی کو اسپیکر بنایا گیا ہے۔دیا کماری نے 2019 کے لوک سبھا انتخابات میں راجسمند سے 5.51 لاکھ سے زیادہ ووٹوں سے الیکشن جیتا تھا۔ ان کا تعلق جے پور کے شاہی خاندان سے ہے۔
مزید پڑھیں: پارلیمنٹ میں مسلسل دوسرے دن بھی ہنگامہ، کارروائی پیر تک ملتوی
انہوں نے 2013 میں سیاست میں قدم رکھا۔ وہ 2 بار ایم ایل اے اور ایک بار ایم پی بھی رہ چکی ہیں۔ وسندھرا راجے، دیا کماری، گجیندر شیکھاوت، بابا بالکناتھ، راجیہ وردھن راٹھور بھی وزیراعلیٰ کی دوڑ میں شامل تھے، لیکن بی جے پی ہائی کمان نے سب کو حیران کر دیا اور بھجن لال کا انتخاب کیا۔
