رانچی: جھارکھنڈ میں سیاسی بحران کے درمیان گورنر نے چمپائی سورین کو حکومت بنانے کی دعوت دی ہے۔ تاہم ابھی تک حلف برداری کی تاریخ کا اعلان نہیں کیا گیا ہے۔ ادھر ذرائع کے مطابق جھارکھنڈ میں بھی ‘ریزورٹ سیاست’ تیز ہو گئی ہے۔ ذرائع کا کہنا ہے کہ ہارس ٹریڈنگ (ایم ایل ایز کی خرید و فروخت) کے خوف سے گرینڈ الائنس کے ایم ایل اے کو رانچی سے حیدرآباد منتقل کیا جا رہا ہے۔ چمپائی سورین کی گورنر سے ملاقات کے بعد ہی ایم ایل اے کو چارٹرڈ بس میں سرکٹ ہاؤس سے باہر لے جایا گیا۔ رپورٹ کے مطابق تمام ایم ایل ایز رانچی ایرپورٹ سے دو چارٹرڈ طیاروں میں تلنگانہ کی راجدھانی حیدرآباد جائیں گے۔
گورنر سے ملاقات کرنے سے پہلے چمپائی سورین نے راج بھون میں ایم ایل اے کی گنتی بھی کروائی۔ اس کی ایک ویڈیو سوشل میڈیا پر شیئر کی جا رہی ہے۔
مزید پڑھیں: ضلعی جج نے ریٹائرمنٹ کے آخری وقت میں ہندو فریق کو گیان واپی مسجد کے تہہ خانے کے اندر پوجا کرنے کی اجازت دی
ویڈیو میں دیکھا جا سکتا ہے کہ گنتی چمپائی سورین سے شروع ہوتی ہے۔ کیمرہ گھومتے ہی ایم ایل اے اپنی موجودگی درج کرانے کے لیے ہاتھ اٹھاتے ہیں۔ بتایا جا رہا ہے کہ یہ ویڈیو مبینہ طور پر گورنر کو اکثریت کے ثبوت کے طور پر دکھایا گیا تھا۔
