پریاگ راج (یو این آئی): اتر پردیش کے پریاگ راج (الہ آباد) کی ایک خصوصی عدالت نے جمعہ کو سابق وزیر راکیش دھر ترپاٹھی کو آمدنی سے زائد اثاثہ جات کیس میں تین سال قید اور 10 لاکھ روپے جرمانے کی سزا سنائی۔ عدالت نے سابق وزیر کی ضمانت منظور کر لی ہے۔
حکومتی وکیل گلاب چندر اگرہری نے کہا کہ ایم پی/ایم ایل اے خصوصی عدالت کے جج ڈاکٹر دنیش چندر شکلا نے سابق وزیر راکیش دھر ترپاٹھی کو قصوروار ٹھہراتے ہوئے فیصلہ سنایا کہ جرمانے کی رقم جمع نہ کرانے پر مزید چھ ماہ قید کی سزا بھگتنی ہوگی۔
مسٹر اگرہری نے کہا کہ خصوصی عدالت نے 108 صفحات کے حکم میں سابق وزیر کے خلاف اپنا فیصلہ سنایا ہے۔ سزا کے بعد سابق وزیر کو جیل بھیجنے کی تیاریاں ہو رہی تھیں۔ وکلاء نے ان کے بڑھاپے اور خراب صحت کا حوالہ دیا، جس کے بعد سابق وزیر کو ایم پی ایم ایل اے کورٹ سے ضمانت مل گئی۔
انہوں نے بتایا کہ 18 جون 2013 کو ویجیلنس اسٹیبلشمنٹ پریاگ راج علاقے کے انسپکٹر رام سبھاگ رام نے ان کے خلاف متھی گنج تھانے میں آمدنی سے زائد پیسہ کمانے کا معاملہ درج کرایا تھا۔ معلوم اور جائز ذرائع سے ملزمان یا ان کے زیر کفالت افراد کی کل آمدنی 49 لاکھ 49 ہزار 928 روپے ظاہر کی گئی اور اس دوران دیکھ بھال پر 2 کروڑ 67 لاکھ 80 ہزار 605 روپے خرچ ہوئے۔ اس کے لیے تسلی بخش وضاحت نہیں دی گئی، جو کہ کرپشن ایکٹ کی دفعہ 13(2) کے تحت جرم کے زمرے میں آتا ہے۔
قابل ذکر ہے کہ راکیش دھر ترپاٹھی کا شمار کبھی بی ایس پی کے طاقتور لیڈروں میں ہوتا تھا۔ بی ایس پی سربراہ کے بہت قریب مانے جانے والے ترپاٹھی کا شمار بڑے برہمن لیڈروں میں ہوتا تھا۔ 2007 کے اسمبلی انتخابات سے پہلے انہوں نے بھارتیہ جنتا پارٹی (بی جے پی) چھوڑ کر بی ایس پی میں شمولیت اختیار کی اور 2007 میں ہنڈیا اسمبلی انتخابات میں حصہ لیا جس میں وہ جیت گئے۔ بی ایس پی کے دور حکومت میں انہیں اعلیٰ تعلیم کا وزیر بھی بنایا گیا تھا۔ 2012 کے اسمبلی انتخابات سے پہلے انہوں نے ایک بار پھر پالا بدلا۔ ٹکٹ نہ ملنے پر وہ پرگتیشیل مانو سماج پارٹی کے امیدوار بن گئے۔ تب پارٹی نے انہیں نکال دیا تھا۔ 2014 کے لوک سبھا انتخابات سے ٹھیک پہلے وہ دوبارہ بی ایس پی میں شامل ہوئے اور انہیں بھدوہی سے امیدوار بنایا گیا لیکن انہیں شکست کا سامنا کرنا پڑا۔
مزید پڑھیں: پہلوان بجرنگ پونیا نے پدم شری ایوارڈ واپس کیا
راکیش دھر ترپاٹھی نے 2022 کے یوپی اسمبلی انتخابات میں پریاگ راج کی پرتاپ پور سیٹ سے اپنا دل سونیلال کے انتخابی نشان پر لڑا تھا لیکن انہیں شکست کا سامنا کرنا پڑا تھا۔
