نئی دہلی :(یو این آئی) حکومت نے آج پارلیمنٹ میں بتایا کہ کووڈ 19 کی وجہ سے چلنے والی سرکاری ائرلائن ائر انڈیا کے 56 ملازمین کی موت ہوئی ہے جب کہ ساڑھے تین ہزار سے زیادہ ملازمین اس بیماری کا شکار ہوچکے ہیں۔
وزیر مملکت برائے شہری ہوا بازی وی کے سنگھ نے لوک سبھا میں ایک سوال کے تحریری جواب میں کہا کہ ائر انڈیا کے کل 3523 ملازمین کووڈ 19 سے متاثر ہوئے ہیں۔ 14 جولائی 2021 تک اس میں سے 56 ملازمین اس وبا کی وجہ سے ہلاک ہوچکے ہیں۔
انہوں نے بتایا کہ پبلک ائر لائن کمپنی نے کووڈ19 سے متاثر ملازمین اور ان کے اہل خانہ کے مفادات کے تحفظ کے لئے متعدد اقدامات کا آغاز کیا ہے۔ کووڈ 19 سے متاثرہ ملازمین کو 17 دنوں کی کورنٹائن کے لئے چھٹی دی گئی ہے۔ مستقل اور کنٹریکٹ کام کرنے والے ملازمین کے اہل خانہ کو ملازمین کی موت پر بالترتیب 10 لاکھ اور 5 لاکھ روپے کی معاوضہ ادا کیا جاتا ہے۔ ایک مقررہ مدت تک معاہدے پر کام کرنے والے ملازمین کی موت کی صورت میں ان کے اہل خانہ کو 90 ہزار روپے یا دو ماہ کی تنخواہ کی ادائیگی کی جاتی ہے۔
سنگھ نے کہا کہ کووڈ ۔19 سے متاثرہ ملازمین کو طبی سہولیات فراہم کی جاتی ہیں۔ کمپنی نے ملازمین اور ان کے کنبہ کے ممبروں کے لئے مختلف مقامات پرکووڈ سنٹرز بھی کھولے ہیں۔ ائر لائن اپنے ملازموں کے پورے کنبے کے ٹیکے لگانے کی قیمت بھی برداشت کر رہی ہے۔
