جودھپور(ایجنسی): ٹی ٹوئنٹی ورلڈ کپ میں بھارت کی شکست اور پاکستان کی جیت سے نہ صرف ادے پور کی ٹیچر نفیسہ اٹاری بلکہ کئی اور لوگ بھی خوش ہوئے ہیں۔ ادے پور جیسا ہی ایک معاملہ جودھپور میں بھی سامنے آیا ہے۔ یہاں کے نوجوان رشید عبدل نے بھی پاکستان کی فتح کے بعد جشن مناتے ہوئے پوسٹ شیر کردی۔ بعد ازاں کسی کے اعتراض کرنے پر اس نے کہا کہ آج میں بہت خوش ہوں۔ لیکن اس کا جشن اس پر بھاری پڑگیا۔ نوجوان کے خلاف مقدمہ درج کرنے کے بعد اسے گرفتار کر لیا گیا ہے اور عدالت نے بھی ضمانت دینے سے انکار کرتے ہوئے جیل کی سلاخوں کے پیچھے بھیج دیا۔
جانکاری کے مطابق یہ معاملہ جودھپور کے پیپاڑ شہر سے متعلق ہے۔ گزشتہ اتوار کو ٹی ٹوئنٹی ورلڈ کپ میں پاک بھارت میچ میں پاکستان کی فتح کے بعد شہر کے رہائشی رشید عبدل نے اپنے واٹس ایپ اسٹیٹس پر اس جیت کی خوشی کا اظہار کیا۔ اپنا اسٹیٹس ٹیگ کرتے ہوئے ایک اور نوجوان نے پوچھا…کیا ہوا، کیوں جشن منا رہے ہو، بھارت کیوں ہارا،؟ اس پر رشید عبدل نے جو جواب دیا وہ چونکا دینے والا تھا۔ انہوں نے جواب میں لکھا کہ ہاں…بہت خوش ہوں…آج۔ اس کے بعد سوال کرنے والے نے جواب دیا کہ پھر آپ یہاں کیوں رہتے ہیں؟
سوشل میڈیا پر جب دونوں نوجوانوں کے درمیان ہونے والی گفتگو کا اسکرین شاٹ وائرل ہوا تو اس معاملے کو لے کر پیپاڑ کے لوگوں میں غم و غصہ پایا گیا۔ اس کے بعد مہیندر ٹاک نامی نوجوان نے اس سلسلے میں پیپاڑ پولیس اسٹیشن میں شکایت کی۔ جس پر پولیس نے ملزم نوجوان کو گرفتار کرکے عدالت میں پیش کیا۔ وہاں سے اسے عدالتی حراست میں جیل بھیج دیا گیا۔
عدالت نے ملزم کی ضمانت منظور نہیں کی۔
ضمانت کی درخواست راشد عبدل کی جانب سے بدھ کو پیپاڑ کے ایڈیشنل چیف جوڈیشل مجسٹریٹ کے سامنے پیش کی گئی۔ لیکن عدالت نے معاملے کو سنگین سمجھتے ہوئے خارج کر دیا۔ عدالت نے ملزم رشید عبدل کی جانب سے سوشل میڈیا پر دیے گئے ریمارکس کو انتہائی سنگین قرار دیتے ہوئے ضمانت دینے سے انکار کردیا۔
ملزم کی جانب سے عدالت میں دلیل دی گئی کہ وہ بے قصور ہے اور اسے اس کیس میں جھوٹا پھنسایا گیا ہے۔ اس پر تبصرہ کرتے ہوئے عدالت نے کہا کہ میسج کو دیکھ کر یہ واضح ہو جاتا ہے کہ ملزم نے ملک دشمنی اور ہم آہنگی کے جذبات کو بھڑکانے کی کوشش کی ہے۔ اس کے علاوہ مہیندر ٹاک کو بھی دھمکی دی گئی ہے۔ اس لیے اسے ضمانت نہیں دی جا سکتی۔
