نئی دہلی (ایجنسیاں):صدر جمہوریہ دروپدی مرمو ملکہ الزبتھ دوم کی سرکاری آخری رسومات میں شرکت اور حکومت ہند کی طرف سے تعزیت پیش کرنے کے لیے لندن، برطانیہ کے لیے روانہ ہوئیں۔ وہ 19 ستمبر کو ملکہ الزبتھ دوم کی آخری رسومات میں شرکت کریں گی۔ پاکستان کے وزیر اعظم شہباز شریف ملکہ الزبتھ دوم کی آخری رسومات میں شرکت کے لیے 19 ستمبر کو برطانیہ جائیں گے۔ بتایا گیا کہ برطانوی حکومت نے وزیراعظم شہباز شریف کو اس اہم موقع پر مدعو کیا ہے۔ ایک بیان میں کہا گیا ہے کہ برطانوی حکومت کی دعوت پر وزیراعظم شہباز شریف 19 ستمبر کو لندن میں ملکہ الزبتھ دوم کی آخری رسومات میں پاکستان کی نمائندگی کریں گے۔ درحقیقت برطانیہ کی سب سے طویل حکمرانی کرنے والی ملکہ الزبتھ دوم 70 سال تک حکومت کرنے کے بعد 8 ستمبر کو اسکاٹ لینڈ کے بالمورل کیسل میں انتقال کر گئی تھیں۔ وہ 96 برس کی تھیں۔
ملکہ الزبتھ دوم کی آخری رسومات پیر کو
لندن (یو این آئی) برطانیہ کے انتظامی حکام اور میٹروپولیٹن پولیس کا خیال ہے کہ ملکہ الزبتھ دوم کی آخری رسومات کی تقریب ملک میں اب تک کی سب سے بڑی تقریب ہوگی۔حکام نے کہا کہ پیر کے روز ہونے والے پروگرام میں شرکت کرنے والے لوگ اپنی شرکت کو ملکہ کے تئیں حقیقی اعزاز اور خصوصی مراعات خیال کر رہے ہیں۔ بی بی سی کی رپورٹ کے مطابق ملکہ کی آخری رسومات کے انتظامات کے لیے مرکزی آپریشن ٹیم میں 100 سے زائد سرکاری اہلکار شامل ہیں، جن کی قیادت محکمہ ثقافت، میڈیا اور کھیل کے مستقل سکریٹری کر رہے ہیں۔ اس موقع پر امریکی صدر جو بائیڈن، فرانسیسی صدر ایمینوئل میکرون اور نیوزی لینڈ کی وزیراعظم جیسنڈا آرڈن سمیت سیکڑوں عالمی رہنما اور معززین لندن پہنچیں گے ۔
