نئی دہلی،(یو این آئی) : مہنگائی کے حوالے سے مودی حکومت کو غیر حساس قرار دیتے ہوئے کانگریس نے کہا ہے کہ اس کی پالیسیوں کی وجہ سے آسمان چھوتی قیمتوں سے عوام کی کمر ٹوٹ گئی ہے ، لیکن حکومت سوئی ہوئی ہے جسے جگانے کے لیے ہلہ بول ریلی میں مہنگائی روکنے کے لیے فوری اقدامات کرنے کا مطالبہ کیا جائے گا۔ کانگریس جنرل سکریٹری کے سی وینوگوپال، میڈیا شعبہ کے سربراہ جے رام رمیش، راجستھان کے انچارج جنرل سکریٹری اجے ماکن، دہلی کے جنرل سکریٹری انچارج شکتی سنگھ گوہل اور دہلی کانگریس کے صدر انیل چودھری نے یہاں رام لیلا میدان میں مشترکہ پریس کانفرنس میں یہ بات کہی۔ تیزی سے بڑھتی مہنگائی نے عوام کی کمر توڑ دی ہے اور اس کے خلاف رام لیلا میدان میں ہلہ بول ریلی ہورہی ہے ۔ وینوگوپال نے کہا کہ کانگریس 2020-21 سے کمر توڑ مہنگائی کے خلاف تحریک چلا رہی ہے اور اسی سلسلے میں اتوار کو یہاں ایک بہت بڑی ریلی کا انعقاد کیا جا رہا ہے جس میں پارٹی کے قومی لیڈروں کے ساتھ ساتھ دہلی اور ملحقہ ریاستوں کے لوگ بڑی تعداد میں شرکت کریں گے ۔ مہنگائی کو روکنے کے لیے فوری اقدامات کا مطالبہ کرتے ہوئے انہوں نے کہا کہ اس ریلی میں کانگریس کے سابق صدر راہل گاندھی اور دیگر رہنما مہنگائی کے مسئلہ پر حکومت کو گھیریں گے اور حکومت پر مہنگائی واپس لنے کے لیے دباؤ ڈالیں گے ۔ حکومت پر ملکی معیشت کو تباہ کرنے کا الزام لگاتے ہوئے انہوں نے کہا کہ ان کی پالیسیوں نے عوام کو مہنگائی کی آگ میں دھکیل دیا ہے ۔مودی حکومت کو مہنگائی کے بارے میں بے حس قرار دیتے ہوئے انہوں نے کہا کہ حیرت کی بات ہے کہ پارلیمنٹ میں اس معاملے پر بحث ہوتی ہے ، اپوزیشن ہنگامہ برپا کرتی ہے ، ملک بھر میں مظاہرے ہو رہے ہیں لیکن حکومت خاموش بیٹھی ہے ۔ انہوں نے کہا کہ حکومت حساسیت کا مظاہرہ کرتے ہوئے عوام کا خیال رکھے اور مہنگائی کو واپس لینے کے لیے فوری اقدامات کرے ۔ جے رام رمیش نے کہا کہ کانگریس مہنگائی کے خلاف مسلسل لڑ رہی ہے ۔ دہلی کے وجے چوک پر مہنگائی کے خلاف احتجاج کرنے والے کانگریس کے 70 ممبران اسمبلی کو حراست میں لے لیا گیا۔ پارٹی کے عام کارکنان اور رہنما اس کے خلاف شور مچا رہے ہیں لیکن حکومت کارروائی کرنے کے بجائے انہیں ہراساں کر رہی ہے ۔ حکومت کی اس پالیسی کے پیش نظر اتوار کو یہاں مہنگائی کے خلاف ہلہ بول ریلی ہورہی ہے ۔
