مہنگائی کے معاملے پر اپوزیشن نے لوک سبھا سے کیا واک آؤٹ

نئی دہلی: (یو این آئی) کانگریس، ڈی ایم کے اور ترنمول کانگریس اور کچھ دیگر اپوزیشن جماعتوں نے بدھ کو مہنگائی کے معاملے پر لوک سبھا سے واک آؤٹ کیا۔ لوک سبھا میں وقفہ سوالات ختم ہوتے ہی ، کانگریس لیڈر ادھیر رنجن چودھری اور دیگر اراکین مہنگائی کو کم کرنے کے سلسلے میں ایوان کے وسط میں آ گئے۔ مہنگائی کم کرنے سے متعلق حکومت کے خلاف نعرے بازی کی اور کچھ دیر بعد ایوان سے واک آؤٹ کر گئے۔
اپوزیشن جماعتوں کے ہنگامے کے درمیان پارلیمانی امور کے وزیر پرہلاد جوشی نے ارکان سے بحث میں شامل ہونے کی اپیل کرتے ہوئے کہا کہ مرکزی وزیر ہردیپ پوری نے اس معاملے پر ایوان کے سامنے اپنا بیان دیا تھا۔ اراکین کو اس معاملے میں ہنگامہ نہیں کرنا چاہیے اور ایوان کی کارروائی میں مثبت تعاون دینا چاہیے۔