جنیوا: (یو این آئی) عالمی ادارہ صحت (ڈبلیو ایچ او) نے کہا ہے کہ کورونا وائرس کی قسم ڈیلٹا سریع الحرکت اور اب تک کی ایسی قسم ہے جو کمزور افراد کو تلاش کرکے ہلاک کرنے کی صلاحیت رکھتی ہے۔
گزشتہ روز کی جانے والی نیوز کانفرنس کے دوران عالمی ادارے کے ہیلتھ ایمرجنسیز کے ایگزیکٹیو ڈائریکٹر ڈاکٹر مائیک ریان نے کہا کہ ڈیلٹا مزید جان لیوا ہوسکتی ہے کیونکہ انسانوں کے درمیان اس کی منتقلی بہت زیادہ مؤثر طریقے سے ہوتی ہے۔انہوں نے کہا کہ ڈیلٹا قسم بتدریج ایسے کمزور افراد تلاش کرلے گی جو بہت زیادہ بیمار ہوجائیں گے، ہسپتال میں داخل ہوگے اور ان کی ہلاکت کا خطرہ ہوگا۔
انہوں نے کہا‘کورونا کی یہ مخصوص قسم سریع الحرکت اور حالات سے مطابقت پیدا کرنے والی ہے، جو سابقہ اقسام کے مقابلے میں کمزور افراد کو زیادہ افادیت سے منتخب کرتی ہے اور اگر لوگوں کی ویکسینیشن نہیں ہوئی تو وہ مستقبل میں خطرے کی زد میں ہوں گے’۔
عالمی ادارہ صحت نے امیر ممالک سے مطالبہ کیا کہ وہ ڈیلٹا کے پھیلاؤ کی رفتار کو سست کرنے کے لیے غریب ممالک کو مزید ویکسینز عطیہ کریں۔ ڈبلیو ایچ او کی کووڈ 19 کی ٹیکنیکل ٹیم کی سربراہ ماریہ وان کرکوف نے کہا کہ ڈیلٹا قسم اب تک 92 ممالک تک پہنچ چکی ہے۔انہوں نے کہا‘بدقسمتی سے ہم اب تک درست مقامات پر لوگوں کی زندگیاں بچانے کے لیے ویکسینز فراہم نہیں کرسکے۔
عالمی ادارے کے عہدیداران کا کہنا ہے کہ ڈیلٹا جلد عامی سطح پر کورونا کی بالادست قسم ہوگی، جس نے برطانیہ میں ایلفا قسم کو پیچھے چھچوڑ دیا ہے اور جلد امریکہ میں بھی غلبہ حاصل کرنے والی ہے۔عالمی ادارہ صحت نے کچھ عرصے قبل باعث تشویش قسم قرار دیا تھا، یعنی یہ زیادہ تیزی سے پھیل سکتی ہے، زیادہ جان لیوا اور ویکسینز کے خلاف زیادہ مزاحم کرتی ہے۔
ڈیلٹا قسم ایلفا کے مقابلے میں بظاہر 60 فیصد زیادہ متعدی ہے جو پہلے ہی دیگر اوریجنل وائرس کے مقابلے میں 50 فیصد زیادہ متعدی قرار دی گئی ہے۔
برطانوی ڈیٹا کے مطابق ڈیلٹا سے متاثر افراد میں ہسپتال داخلے کا خطرہ دوگنا زیادہ ہوتا ہے۔ ایسا خیال کیا جارہا ہے کہ ویکسین کی پہلی خوراک کے استعمال سے اس نئی قسم سے زیادہ تحفظ حاصل نہیں ہوتا۔
ایک تحقیق میں دریافت کیا گیا تھا کہ فائزر یا ایسٹرا ینیکا ویکسینز کی پہلی خوراک سے ڈیلٹا کی علامات والی بیماری سے محض 33 فیصد تحفظ ملتا ہے، تاہم 2 خوراکوں سے تیہ شرح کافی زیادہ بڑھ جاتی ہے۔
واضح رہے کہ کورونا کی یہ قسم سب سے پہلے ہندوستان میں سامنے آئی تھی جس کے نتیجے میں وہاں دوسری لہر کے دوران ریکارڈ کیسز اور اموات ہوئی تھیں۔
