نئی دہلی (ایجنسیاں): راجیہ سبھا انتخابات سے شروع ہونے والا سیاسی اتھل پتھل اب ہماچل کی سکھو حکومت کیلئے مصیبت بن گئی ہے۔ راجیہ سبھا انتخابات میں کانگریس کے 6 ارکان اسمبلی نے پارٹی لائن کے خلاف جا کر کراس ووٹنگ کی تووہیں اگلے ہی دن سابق وزیر اعلیٰ آنجہانی ویربھدر سنگھ کے بیٹے وکرمادتیہ سنگھ نے سکھوندر سنگھ سکھو کی قیادت والی حکومت میں وزیر کے عہدے سے استعفیٰ دے دیا۔ ادھر سکھو کے استعفیٰ پربھی بات ہونے لگی۔ وزیر اعلیٰ سکھو کو سامنے آنا پڑاا ور انہوں نے واضح طور پر کہا کہ میں ’یودھا‘ ہوں، ہر چیلنج سے لڑنے کیلئے تیار ہوں۔
انہوں نے 5 سال حکومت چلانے کا دعویٰ کیا اور استعفوں کی خبروں کو افواہ قرار دیتے ہوئے کہا کہ ہمارے پاس اکثریت ہے جو ایوان میں ووٹنگ سے صاف ہو جائے گی۔ ہم 5 سال حکومت چلائیں گے۔ وزیر کے عہدے سے استعفیٰ دے کر وکرمادتیہ نے ایک طرح سے سرخ لکیر کھینچ دی کہ ان کا گروپ اب ’آر یا پار‘ کے موڈ میں ہے۔ وہ پیچھے نہیں ہٹے گا۔
دوسری جانب خود کو ’یودھا‘ کہنے والے اور 5 سال حکومت چلانے کا دعویٰ کرنے والے وزیراعلیٰ سکھو نے اپنے استعفیٰ کی خبروں کو مسترد کرتے ہوئے واضح کر دیا کہ وہ کرسی نہیں چھوڑیں گے۔ اب کانگریس مخمصے میں ہے۔ اگر سکھو وزیر اعلیٰ رہتے ہیں تو ناراض وکرمادتیہ گروپ کے ارکان اسمبلی منتشر ہو سکتے ہیں اور حکومت کے اقلیت میں آنے کا خطرہ ہے۔ اگر سکھو کو ہٹانے کے بعد وہ حکومت کی کمان وکرمادتیہ گروپ کے کسی لیڈر یا کسی دوسرے لیڈر کو سونپتی ہے تو قیادت کی کمزوری کا پیغام جائے گا۔موجودہ صورتحال میں ہماچل پردیش میں حکومت بچانے کے لیے کانگریس کے پاس اب کتنے راستے ہیں؟ حکمراں جماعت کے 6 ارکان اسمبلی نے، جنہوں نے کانگریس امیدوار کے خلاف کراس ووٹنگ کی، ہماچل اسمبلی میں اپوزیشن لیڈر جے رام ٹھاکر سے بھی ملاقات کی ہے۔ کراس ووٹنگ کے بعد ہریانہ کے پنچکولہ جانے والے 6 ارکان اسمبلی جب اسمبلی کی کارروائی میں حصہ لینے شملہ پہنچے تو ان میں سے کچھ نے کھل کر کہا کہ وہ اب بی جے پی کے ساتھ ہیں۔ یہ بھی کانگریس قیادت کے لیے بغاوت کا واضح پیغام ہے۔
اسمبلی کا نمبر گیم کانگریس حکومت کے خلاف لگتا ہے لیکن سکھو حکومت کو بچانے اور اسے 5 سال چلانے کا دعویٰ کر رہے ہیں۔ کانگریس کے میڈیا ڈپارٹمنٹ کے چیئرمین جے رام رمیش بھی ہماچل میں جاری کشمکش کے درمیان سامنے آئے اور واضح طور پر کہا کہ فی الحال ہماری ترجیح حکومت کو بچانا اور آپریشن لوٹس کو ناکام بنانا ہے۔ شملہ سے لے کر دہلی تک کانگریس لیڈر حکومت بچانے کے دعوے کر رہے ہیں۔ اسمبلی سے بجٹ کی منظوری کے بعد ایوان کی کارروائی غیر معینہ مدت کے لیے ملتوی کر دی گئی ہے۔فی الحال سکھو حکومت کو فوری راحت مل گئی ہے لیکن سوال یہ بھی اٹھ رہے ہیں کہ یہ راحت کب تک رہے گی اور کیا اس سے حکومت پر چھائے بحران کے بادل چھٹ گئے ہیں؟ کہا جا رہا ہے کہ سکھو حکومت کم از کم اسمبلی کے اگلے اجلاس تک محفوظ ہے۔ لیکن یہ بات بھی قابل غور ہے کہ جب کسی حکومت کے پاس نمبر ہونے یا نہ ہونے کے بارے میں شک ہو تو گورنر کسی بھی وقت خصوصی اجلاس بلا کر ایوان میں اپنی اکثریت ثابت کرنے کو کہتے ہیں۔ ایسے میں سکھو حکومت کو دی گئی اس فوری راحت نے یقینی طور پر کانگریس کو ڈیمیج کنٹرول کے لیے وقت دیا ہے۔ اب سوال یہ ہے کہ کانگریس کیسے ڈیمیج کنٹرول کرے گی؟
ہماچل انتخابات میں کراس ووٹنگ کی وجہ سے کانگریس کو راجیہ سبھا سیٹ سے شکست کا سامنا کرنا پڑا جہاں پارٹی امیدوار کی جیت یقینی سمجھی جا رہی تھی۔ ہماچل کے انتخابی نتائج کے فوراً بعد کانگریس قیادت سرگرم ہوگئی اور کرناٹک کے نائب وزیراعلیٰ ڈی کے شیوکمار، ہریانہ کے سابق وزیراعلیٰ بھوپیندر سنگھ ہڈا، چھتیس گڑھ کے سابق وزریاعلیٰ بھوپیش بگھیل کو بطور مبصر مقرر کرکے شملہ بھیجنے کا اعلان کر دیا۔
کانگریس قیادت نے مبصرین اور ریاستی کانگریس کے انچارج راجیو شکلا سے کہا ہے کہ وہ ہر ایم ایل اے کے مسائل سنیں اور اس سے نمٹنے کا راستہ تلاش کریں۔ کانگریس کا منصوبہ ہر ایم ایل اے سے رائے شماری لے کر اس بحران سے نکلنے کا راستہ تلاش کرنا ہے۔ جے رام رمیش نے یہ بھی کہا ہے کہ اگر اس کے لیے کچھ سخت فیصلے بھی لینے پڑیں تو ہم پیچھے نہیں ہٹیں گے۔ اب وہ سخت فیصلے کیا ہوں گے؟ یہ دیکھنا ہوگا۔6 ارکان اسمبلی کی بغاوت کے بعد وکرمادتیہ کے استعفیٰ کی وجہ سے ہماچل اسمبلی میں نمبروں کا کھیل پیچیدہ ہو گیا ہے۔ سکھو حکومت کو 40 میں سے 33 کانگریس ایم ایل ایز کی حمایت حاصل ہے۔ 68 رکنی اسمبلی میں اکثریت کے لیے مطلوبہ جادوئی اعداد و شمار 35 ہے۔ تازہ ترین صورتحال پر نظر ڈالیں تو کانگریس 2 پیچھے نظر آرہی ہے۔ دوسری طرف بی جے پی کے پاس 25 ایم ایل اے ہیں۔ کانگریس کے 7 ایم ایل اے نے باغی موقف اختیار کیا ہے، جبکہ 2 آزادوں سمیت 3 دیگر ایم ایل اے بھی باغی ہیں اور اگر ہم 3 آزاد سمیت 10 ایم ایل ایز کو شامل کریں تو 35 ایم ایل اے حکومت کے خلاف نظر آتے ہیں۔کانگریس نے بھی ایسی صورتحال سے نمٹنے کے لیے ایک منصوبہ پر کام شروع کر دیا ہے۔ اسمبلی سے باہر آنے کے بعد وزیراعلیٰ سکھو نے کراس ووٹنگ کرنے والے ایم ایل ایز کے خلاف کارروائی کے سوال پر کہا کہ کچھ ہمارے ساتھ رابطے میں ہیں اور وہپ کی خلاف ورزی پر اسپیکر کے چیمبر میں 3 کے خلاف کارروائی چل رہی ہے۔
وزیراعلیٰ سکھو نے کہا کہ چیف وہپ نے ہمیں بتایا ہے کہ بجٹ کے حوالے سے 3 سطری وہپ جاری کیا گیا تھا لیکن یہ ایم ایل ایز نہیں پہنچے، جس کی وجہ سے اسپیکر کے چیمبر میں کارروائی شروع کردی گئی ہے۔پہلے جے رام رمیش نے کہا کہ ہمیں کچھ سخت فیصلے لینے پڑ سکتے ہیں اور ہم اس سے پیچھے نہیں ہٹیں گے۔ اس کے کچھ دیر بعد اسپیکر کے چیمبر میں وزیراعلیٰ سکھو کی جانب سے وہپ کی خلاف ورزی کے حوالے سے کارروائی جاری ہے۔ پہلے 3 ایم ایل ایز کے خلاف نااہلی کی کارروائی کی خبر آئی اور بعد میں تمام 6 کے خلاف کارروائی کی بات ہوئی۔ بجٹ پر ووٹنگ کے دوران وہپ کی خلاف ورزی کی صورت میں ان ایم ایل ایز کو بھی نااہل قرار دیا جا سکتا ہے۔
مزید پڑھیں: ہماچل میں حکومت گرانے کی کوشش غیر آئینی اور غیر اخلاقی: کانگریس
اگر ایم ایل اے نااہل ہوئے تو نمبر گیم کیسے بدلے گی؟اسپیکر کانگریس سے ہیں، اس لیے وہپ کی خلاف ورزی کے معاملے میں ان ایم ایل ایز کے خلاف کارروائی جلد ہی اپنے انجام کو پہنچ سکتی ہے۔ اگر ایسا ہوتا ہے کہ 6 باغی ایم ایل اے اسمبلی کی رکنیت سے نااہل ہو جاتے ہیں تو ہماچل اسمبلی کا نمبر گیم بدل جائے گا۔ 68 رکنی اسمبلی کی تعداد کم ہو کر 62 رہ جائے گی اور ایسی صورت حال میں اکثریتی تعداد بھی کم ہو کر 32 ہو جائے گی۔ اگر وکرمادتیہ کو ہٹا دیا جاتا ہے تب بھی کانگریس کو 33 ایم ایل اے کی حمایت حاصل ہے۔ اس کے ساتھ ہی کم از کم 6 خالی نشستوں پر ضمنی انتخابات کے نتائج کا اعلان ہونے تک سکھو حکومت محفوظ ہو جائے گی۔
