نئی دہلی:مدھیہ پردیش کے ریوا میں زبردست سڑک حادثہ ہوا ہے۔ جس میں 15 افراد کی موت ہوگئی ہے۔ میڈیا ذرائع کے مطابق گڑ
بائپاس پر ٹرک اور بس کے درمیان تصادم ہوا۔ جس کی وجہ سے تقریباً نصف درجن لوگوں نے موقع پر ہی دم توڑ دیا۔ اس حادثے میں
درجنوں افراد کے زخمی ہونے کی بھی اطلاع ہے۔ زخمیوں کو فوری طور پر سنجے گاندھی اسپتال میں داخل کرایا گیا ہے۔ بتایا جا رہا
ہے کہ زخمیوں میں کئی کی حالت اس وقت سنگین بنی ہوئی ہے۔
آج بروز جمعرات کی صبح تقریباً ساڑھے 6 بجے حادثہ پیش آیا۔ حادثہ کی خبر ملتے ہی پولس اور انتظامیہ کی ٹیم جائے وقوع پر
پہنچی اور راحت و بچاؤ کام شروع کر دیا۔
ذرائع کے مطابق بس میں 65 سے زیادہ مسافر سوار تھے۔ معمولی طور پر زخمی مسافروں نے بتایا کہ ڈرائیور بس کو کافی تیز چلا
رہا تھا۔ اس دوران گڑ بائپاس پر اس نے بس پر سے اپنا کنٹرول گنوا دیا اور بس سامنے سے آ رہے ٹرک سے جا کر ٹکرا گئی۔ حادثہ میں
بس کے اگلے حصے کے پرخچے اڑ گئے۔ ڈرائیور کے قریب بیٹھے مسافروں کے بارے میں بتایا جاتا ہے کہ حادثہ کے وقت ہی ان
کی موت واقع ہو گئی۔حادثے میں ایک بچی اور دو خواتین کی بھی موت ہوئی ہے۔
