نئی دہلی(ایجنسیاں): ممبئی سے گوہاٹی جانے والی انڈیگو کی پرواز کی بنگلہ دیش کے دارالحکومت ڈھاکہ میں ہنگامی لینڈنگ کی اطلاع موصول ہوئی ہے۔ رپورٹ کے مطابق انڈیگو کی فلائٹ نمبر 6E 5319 کو ممبئی سے گوہاٹی جانا تھا لیکن گوہاٹی میں شید دھند کی وجہ سے فلائٹ وہاں نہیں اتر سکی اور اسے ڈھاکہ ایئرپورٹ پر اتارا گیا۔
دلچسپ بات یہ ہے کہ اس پرواز کے تمام مسافروں کے پاس پاسپورٹ نہیں ہیں، لہٰذا انہیں ڈھاکہ ایئرپورٹ پر ہی بیٹھے رہنا پڑا۔ ممبئی یوتھ کانگریس کے سابق سربراہ سورج سنگھ ٹھاکر نے سوشل میڈیا پلیٹ فارم ایکس پر پوسٹ کیا کہ ان کی فلائٹ جو ممبئی سے گوہاٹی جا رہی تھی فی الحال ڈھاکہ میں اتر چکی ہے۔
انہوں نے مزید لکھا کہ میں ممبئی سے گوہاٹی جانے والی IndiGo6E فلائٹ نمبر 6E 5319 میں سوار ہوا تھا لیکن شدید دھند کی وجہ سے پرواز گوہاٹی میں نہیں اتر سکی۔ اسے گوہاٹی کے بجائے ڈھاکہ میں اتارا گیا۔ طیارے میں بیٹھے مسافروں میں سے کسی کے پاس پاسپورٹ نہیں ہے اور سب ڈھاکہ ایئرپورٹ پر بغیر پاسپورٹ کے بیٹھے ہیں۔
مزید پڑھیں: عالمی عدالت انصاف کی بینچ میں 3 عرب جج بھی شامل ہوئے
انہوں نے لکھاکہ ہم گزشتہ 9 گھنٹے سے فلائٹ کے اندر ہیں۔ مجھے امپھال جانا تھا جہاں سے میں ’بھارت جوڑو نیائے یاترا‘ میں حصہ لینے جا رہا تھا۔ اب دیکھتے ہیں کہ میں کب گوہاٹی پہنچتا ہوں اور پھر وہاں سے کب امپھال پہنچ سکتا ہوں۔
