لکھنؤ (یو این آئی) : سماجوادی پارٹی(ایس پی)سربراہ اکھلیش یادو نے جمعرات کو اپنے چچا و پرگتی شیل سماج وادی پارٹی کے سربراہ شیوپال سنگھ یادو سے کئی سالوں کے طویل انتظار کے بعد آج ان کی رہائش گاہ پہنچ کر ملاقات کی۔تقریبا ڈیڑھ گھنٹے کی ملاقات کے درمیان ہوئی بات چیت کی تفصیلات فی الحال دونوں پارٹیوں نے جاری نہیں کی ہیں، تاہم اکھلیش یادو نے اپنے ٹوئٹ کے ذریعہ اتحاد کی خبر دیتے ہوئے لکھاکہ پرگتی شیل سماجوادی پارٹی کے سربراہ سے ملاقات میں اتحاد کی بات طے ہوئی ہے، مقامی پارٹیوں کو ساتھ لینے کی پالیسی ایس پی کو لگاتار مضبوط کررہی ہے اور ایس پی و دیگر اتحادی پارٹیوں کو تاریخی جیت کی جانب لے جارہی ہے۔ اس سے قبل اکھلیش دوپہر بعد لکھنؤ واقع شیوپال کی رہائش گاہ پر پہنچے۔ دونوں کے درمیان بند کمرے میں ملاقات ہوئی۔ تاہم مانا جاتا ہے کہ اکھلیش اور شیوپال کے درمیان لمبے انتظار کے بعد ہوئی اس ملاقات میں چچا-بھتیجے نے سابقہ شکوے شکایات کو دور کر کے آنے والے اسمبلی انتخابات میں سیٹوں کی تقسیم پر تبادلہ خیال کیا ہے۔ قابل ذکر ہے کہ یوپی اسمبلی کے گزشتہ انتخابات کے وقت ہی اکھلیش اور شیوپال کے رشتوں میں تلخی پیدا ہوئی تھی اور ابھی تک جاری تھی۔ حالانکہ شیوپال نے آنے والے اسمبلی انتخابات کے پیش نظر چچا-بھتیجے کے درمیان تلخیوں کو کم کرنے کا آغاز کرتے ہوئے اکھلیش کے ساتھ اتحاد کی پیشکش کردی تھی۔ شیوپال نے ایس پی میں انضمام کے امکانات کو بھی ظاہر کرتے ہوئے کہا تھا کہ اکھلیش کو ہی آگے کی سیاست کیلئے کوئی پہل کرنی ہوگی۔ گزشتہ کچھ وقت سے اکھلیش بھی شیوپال کی پہل پر مثبت تبصرہ کرتے ہوئے وقت آنے پر ان سے بات کرنے کی بات کہہ رہے تھے ۔
سال 2017کے اسمبلی انتخابات میں ایس پی سے علیحدگی کے بعد شیوپال نے اپنی علیحدہ پارٹی کی تشکیل کا اعلان کیا تھااور اس کا سیدھا اثر ایس پی کے روایتی ووٹوں پر تقسیم کی صورت میں پڑا تھا۔
