سری نگر:جنوبی ضلع کولگام کے ژنی گام میں ہونے والے ایک شبانہ مسلح تصادم میں دو جنگجو مارے گئے ہیں۔
جموں و کشمیر پولیس کے ایک ترجمان نے بتایا کہ کولگام کے ژنی گام میں ایک مسلح تصادم میں دو جنگجو مارے گئے۔ انہوں نے مزید کہا کہ علاقے میں سرچ آپریشن جاری ہے۔
سرکاری ذرائع نے تفصیلات فراہم کرتے ہوئے کہا کہ کولگام کے ژنی گام میں جنگجووں کی موجودگی سے متعلق خفیہ اطلاع ملنے پر پولیس، فوج کی ایک راشٹریہ رائفلز اورسی آر پی ایف نے مذکورہ علاقے میں گذشتہ رات کارڈن اینڈ سرچ آپریشن شروع کیا۔
انہوں نے کہا کہ ایک مشتبہ جگہ کو محاصرے میں لینے کے دوران وہاں موجود جنگجووں نے فائرنگ کی جس کے بعد طرفین کے درمیان مسلح تصادم چھڑ گیا جس میں دو جنگجو مارے گئے۔
انتظامیہ نے احتیاط کے طور ضلع کولگام میں موبائل انٹرنیٹ خدمات منقطع کر دی ہیں نیزسکیورٹی فورسز کی اضافی نفری تعینات کر دی ہے۔
