نئی دہلی (ایجنسی) :آئی پی سی کی دفعہ 124 اے کے آئینی جواز کو چیلنج کرنے والی ایک عرضی پر سماعت کرتے ہوئے، سپریم کورٹ نے بدھ کو بغاوت کے قانون پر فی الحال روک لگا دی۔ عدالت نے واضح کیا ہے کہ نظر ثانی تک 124 اے کے تحت مقدمہ درج نہ کیا جائے۔
سپریم کورٹ نے عرضی پر سماعت کرتے ہوئے کہا کہ جب تک غداری قانون پر دوبارہ غور نہیں کیا جاتا، ریاستی اور مرکزی حکومتیں بغاوت کے قانون کے تحت مقدمہ درج نہیں کریں گی۔
سپریم کورٹ نے مرکزی حکومت کو آئی پی سی کی دفعہ 124 اے کے ان دفعات پر نظر ثانی کرنے اور دوبارہ غور کرنے کی اجازت دی ہے جو بغاوت کو جرم بناتی ہے۔ اس کے ساتھ ہی سپریم کورٹ نے کہا کہ جن کے خلاف بغاوت کے مقدمات چل رہے ہیں اور وہ جیل میں ہیں، وہ ضمانت کے لیے عدالت جا سکتے ہیں۔
بغاوت کے ان مقدمات پر سیاست گرم ہو جاتی ہے۔ حال ہی میں مہاراشٹر میں نونیت رانا اور ان کے شوہر کے خلاف بغاوت کا مقدمہ درج کیا گیا تھا۔
اشتعال انگیز تقاریر کرنے کے الزام میں شرجیل امام کے خلاف بغاوت کا مقدمہ بھی درج کیا گیا۔ اس کے ساتھ ہی جے این یو کے سابق طلباء کنہیا کمار اور عمر خالد کے خلاف بھی غداری کا مقدمہ درج کیا گیا تھا۔ ساتھ ہی ریزرویشن کا مطالبہ کرنے والے ہاردک پٹیل پر بھی غداری کی دفعہ کے تحت مقدمہ درج کیا گیا تھا۔ اس کے علاوہ کارٹونسٹ اسیم ترویدی کے خلاف آئین کا مذاق اڑانے پر غداری کا مقدمہ درج کیا گیا تھا۔
این سی آر بی کے جاری کردہ اعداد و شمار کے مطابق، 2010 سے 2020 تک، بہار میں سب سے زیادہ 168 بغاوت کے مقدمات درج ہوئے۔ اس کے بعد تمل ناڈو 139 اور اتر پردیش 115 کے ساتھ دوسرے نمبر پر ہے۔
