نئی دہلی (ایجنسیاں)ملک میں مہنگے پٹرول اور ڈیزل کا اثر اب مانگ میں بھی نظر آرہا ہے۔ پرائمری انڈسٹری کے اعداد و شمار کے مطابق اپریل کے پہلے 15 دنوں میں پٹرول کی فروخت میں تقریباً 10 فیصد اور ڈیزل کی فروخت میں تقریباً 15.6 فیصد کی کمی آئی ہے جو گزشتہ ماہ کی اسی مدت کے مقابلے میں ہے۔ وہیں یکم اپریل سے 15 اپریل کے درمیان ایل پی جی کی مانگ میں 1.7 فیصد کمی آئی ہے۔ واضح رہے کہ وبا کے دوران بھی ایل پی جی کی مانگ میں اضافہ دیکھا گیا تھا۔ نومبر سے ملک میں سرکاری تیل کمپنیوں کی جانب سے 137 دنوں تک پٹرول اور ڈیزل کی قیمتوں میں اضافہ نہیں کیا گیا۔ لیکن اس عرصے کے دوران بین الاقوامی منڈی میں خام تیل کی قیمت 30 ڈالر فی بیرل تک بڑھ گئی تھی۔ ملک میں خام تیل کی بڑھتی ہوئی قیمتوں پر پیٹرول اور ڈیزل کی قیمتوں میں اضافے کی وجہ سے اپوزیشن کی جانب سے الزام لگایا گیا تھا کہ حکومت 5 ریاستوں میں اسمبلی انتخابات کی وجہ سے قیمت نہیں بڑھا رہی ہے۔اس کے بعد سے پٹرول اور ڈیزل کی قیمت میں 10 روپے فی لیٹر تک اضافہ کیا گیا ہے جب کہ ایل پی جی سلنڈر کی قیمت میں 22 مارچ کو 50 روپے کا اضافہ کیا گیا تھا۔ اس کے ساتھ ہی سی این جی اور پی این جی کی قیمتوں میں بھی 15 روپے فی کلو تک اضافہ کیا گیا ہے۔ پیٹرولیم انڈسٹری کے اعداد و شمار کے مطابق سرکاری تیل کمپنیوں نے یکم سے 15 اپریل کے درمیان 11.20 لاکھ ٹن پیٹرول فروخت کیا تھا۔ گزشتہ ماہ کی اسی مدت میں تقریباً 12.4 لاکھ ٹن پیٹرول فروخت ہوا تھا۔ یکم اپریل سے 15 اپریل کے درمیان تقریباً 30 لاکھ ٹن ڈیزل فروخت ہوا ہے، جبکہ گزشتہ ماہ کی اسی مدت میں تقریباً 35.3 لاکھ ٹن ڈیزل فروخت ہوا تھا۔
