پرتھ، : (یو این آئی) شاداب خان (22/3) کی قیادت میں گیند بازوں کی شاندار کارکردگی کی بدولت پاکستان نے آئی سی سی ٹی 20 ورلڈ کپ 2022 میں ہالینڈ کو 91 رنز پر محدود کر دیا۔
یہ ٹی۔ٹوئنٹی ورلڈ کپ 2022 کا سب سے کم اسکور ہے۔ پاکستان کو ٹورنامنٹ میں پہلی جیت کے لیے 20 اوورز میں 92 رنز درکار ہیں۔
گروپ ٹو کے میچ میں ہالینڈ نے ٹاس جیت کر بیٹنگ کا فیصلہ کیا لیکن اس کے پاس پاکستانی بولنگ کا کوئی جواب نہیں تھا۔ انہوں نے چھ اوورز میں صرف 19 رنز بنائے اور اوپنر اسٹیفن میبرگ کو شاہین شاہ آفریدی کی گیند پر آؤٹ کیا، جو کہ ٹورنامنٹ کے پاور پلے میں سب سے کم اسکور ہے۔ اس دوران تجربہ کار آل راؤنڈر باس ڈی لیڈ حارث رؤف کے باؤنسر پر انجری کا شکار ہو کر ریٹائر ہو گئے۔
شاداب نے محتاط بولنگ کرتے ہوئے میکس او ڈاؤڈ اور ٹام کوپر کی وکٹیں حاصل کیں۔ کولن ایکرمین (27) اچھی فارم میں نظر آرہے تھے لیکن شاداب نے انہیں پویلین بھیج دیا۔
ہالینڈ کی 61 رنز پر چار وکٹیں گرنے کے بعد پاکستان کے تیز گیند بازوں نے برتری حاصل کی۔ نسیم شاہ نے اسکاٹ ایڈورڈز کی وکٹ حاصل کی جب کہ حارث نے روئیلوف وین ڈیر مروے کو بولڈ کیا۔ محمد وسیم جونیئر نے 19ویں اوور میں ٹم پرنگل اور فریڈ کلاسن کو لگاتار گیندوں پر آؤٹ کیا، حالانکہ وہ ہیٹ ٹرک مکمل نہیں کر سکے۔
ہالینڈ نے آخری اوور میں وین میکرن کا وکٹ کھو کر 91/9 اسکور کھڑا کیا۔ دونوں ٹیمیں اپنا تیسرا میچ کھیلتے ہوئے ٹورنامنٹ کی پہلی جیت کی تلاش میں ہیں۔
