نئی دہلی (ایس این بی) :آلٹ نیوز کے شریک بانی محمد زبیر کو مائیکرو بلاگنگ سائٹ ٹوئٹر کے صارف کی وجہ سے گرفتار کیا گیا تھا، جو دہلی میں رہتا ہے اورایک رئیل اسٹیٹ بزنس مین ہے۔ وہ آبائی طور سے اجمیر، راجستھان کا رہنے والا ہے۔ پولیس نے بدھ کو یہ جانکاری دی۔ در اصل پولیس افسران نے تاجر کا نام عام نہیں کیا۔ وہ ٹوئٹر ہینڈل ’بالاجیکیجے ‘کی شناخت کا پتہ لگانے کی کوشش کر رہے ہیں، جسے ہنومان بھکت کے نام سے چلایا جاتا ہے۔ انہوں نے کہا کہ اس بات کا کوئی ثبوت نہیں ملا کہ تاجر کا کسی سیاسی جماعت سے تعلق تھا۔ جانچ سے منسلک ایک پولیس اہلکار نے کہا کہ تفتیش سے پتہ چلا ہے کہ بے نام ٹویٹر ہینڈل ایک 36 سالہ ریئل اسٹیٹ بزنس مین چلاتا تھا، جو اصل میں اجمیر، راجستھان کا رہنے والا ہے اور اس وقت دوارکا میں رہتا ہے۔
افسر نے کہا کہ ٹویٹر کے جواب کے بعد، پولیس نے اسے آئی پی ایڈریس کا استعمال کرتے ہوئے ٹریس کیا اور اسے تحقیقات میں شامل ہونے کے لیے ایک باضابطہ نوٹس بھیجا ہے۔ تاجر نے پولیس کو اپنے بیان میں کہا کہ اس کے مذہبی جذبات مجروح ہوئے ہیں۔ زبیر کو 2018 میں 27 جون کو ایک ہندو دیوتا کے بارے میں ٹویٹ کرکے مذہبی جذبات کو ٹھیس پہنچانے کے الزام میں گرفتار کیا گیا تھا۔ اسے 24 دن تک حراست میں رکھا گیا اور اب وہ ضمانت پر باہر ہیں۔
پولیس افسران کے مطابق، تاجر نے دہلی پولیس کو ’ٹیگ ‘کیا تھا اور ان سے ٹویٹر پر 2018 کی پوسٹ کے تناظر میں کارروائی کرنے کی اپیل کی تھی۔ تاجر نے کہا تھا کہ اس کے مذہبی جذبات مجروح ہوئے ہیں۔ بعد ازاں شکایت درج کرائی گئی جس کی بنیاد پر زبیر کو گرفتار کر لیا گیا۔ تاجر کا ٹوئٹر اکاؤنٹ فی الحال بند ہے۔ پولیس نے بتایا کہ تاجر چند سال قبل اپنے خاندان کے ساتھ اجمیر سے دہلی منتقل ہوا تھا۔ زبیر کے خلاف دو ایف آئی آر اتر پردیش کے ہاتھرس میں، ایک ایک سیتا پور، لکھیم پور کھیری، مظفر نگر، غازی آباد اور چندولی میں مذہبی جذبات کو ٹھیس پہنچانے کے الزام میں درج کی گئی ہیں۔
