نئی دہلی: اترپردیش کے ضلع مظفر نگر میں ایک سرکاری بس نے اپنے گھر کی طرف پیدل جانے والے تارکین مزدور کو کچل ڈالا۔ اس حادثے میں 6 مزدوروں کی موت ہوگئی ہے اور 4 افراد شدید زخمی ہوگئے ہیں۔ زخمیوں میں سے دو کی حالت تشویشناک بتائی جارہی ہے۔ اتر پردیش کے سابق وزیر اعلی اور سماج وادی پارٹی کے سربراہ اکھلیش یادو نے اس واقعے پر گہرے دکھ کا اظہار کیا ہے۔ انہوں نے مرکزی حکومت سے سوال کیا ہے کہ مزدوروں کی زندگی اتنی سستی کیوں ہے؟
اکھلیش یادو نے اس واقعے کے بعد اپنی ٹویٹ میں کہا ، "یوپی کے مظفر نگر بس حادثے میں مہاجر مزدوروں کی دردناک موت پر گہرا غم۔ خراج تحسین! پہلے ٹرین اور اب بس حادثہ ، مزدوروں کی زندگیاں اتنی سستی کیوں ہیں؟" وندے بھارت مشن میں کیا ملک کے غریب عوام نہیں آسکتے۔ اتنا اوپر اڑنا درست نہیں کہ زمین کی سچائی کو نظرانداز کردیا جائے۔ " مظفر نگر حادثہ پر ریاستی وزیر اعلی یوگی آدتیہ ناتھ نے ایک اعلی عہدیدار کو حادثے کے حالات کی تحقیقات کا حکم دیا ہے۔ اس کے ساتھ ہی حادثے میں جاں بحق ہونے والوں کے لواحقین کو 2 لاکھ اور زخمیوں کو 50،000 روپے معاوضہ دینے کا اعلان کیا ہے۔ بس کے ڈرائیور کو گرفتار کرلیا گیا ہے۔ غور طلب ہے کہ یوپی کے مظفر نگر ضلع میں ایک سڑک حادثے میں 6 تارکین وطن مزدور فوت ہوگئے ہیں اور 4 شدید زخمی ہوئے ہیں۔ حادثے کے شکار تمام مزدورپنجاب میں مزدوری کرتے تھے۔ وہ وہاں سے پیدل چل کر بہار کے گوپال گنج جا رہے تھے۔ رات کے اندھیرے میں گزرتی خالی روڈ وے بس نے انہیں کچل ڈالا۔ جب انہیں اسپتال لے جایا گیا تو ڈاکٹروں نے 6 افراد کو مردہ قرار دے دیا۔ زخمیوں میں سے 4 میں سے دو کی حالت زیادہ تشویشناک ہے اور انہیں میرٹھ میڈیکل کالج میں علاج کے لئے بھیج دیا گیا ہے۔ واضح رہے ملک میں ہزاروں تارکین وطن اپنے آبائی شہر جانے کے لیے پیدل ہی نکل پڑے ہیں۔
