آسام:(ایجنسی):چارسالہ بچے نے اپنے والد کے قتل میں انصاف طلب کیا ہے۔ بچے نے اس معاملے میں وزیر اعظم مودی اوروزیر داخلہ امیت شاہ تک اپنی بات پہنچانے کی کوشش کی۔
لڑکے نے ٹوئٹر پر ایک ویڈیو پوسٹ کی ہے اور پی ایم مودی،امیت شاہ اور وزیر اعلیٰ ہمنت بسوا سرما سے انصاف کی اپیل کی ہے۔ اس ویڈیو میں وہ ایک پلے کارڈ پکڑے ہوئے نظر آرہا ہے جس پر لکھا ہے’مجھے انصاف چاہیے‘۔ 45 سیکنڈ کی اس ویڈیو میں بچہ کہہ رہا ہے کہ میرا نام رضوان شاہد لسکر ہے۔ جب میں 3 ماہ کا تھا،26 دسمبر 2016 کو میرے والد کو 11 شرپسندوں نے بے دردی سے قتل کردیا۔ اب میں وزیر اعظم،وزیر داخلہ اور معزز وزیر اعلیٰ سے درخواست کرتا ہوں کہ وہ اس معاملے کو دیکھیں اور ہمیں انصاف دیں۔ بہت بہت شکریہ۔
اطلاعات کے مطابق رضوان کے والد ٹھیکیدار تھے اور انہیں مبینہ طور پر ان کے دفتر کے قریب ریت مافیا کے ارکان نے قتل کیا تھا۔ اس کی بیوہ جنت الفردوسی لسکر نے ضلع کچھار میں شکایت درج کرائی تھی کہ اس کے شوہر کے قتل میں 11 افراد پر مبینہ طور پر ملوث ہونے کا الزام ہے۔ انڈیا ٹوڈے کے مطابق رضوان کے چچا مہید الحق لسکر نے بتایا کہ اس نے اپنے بھتیجے کو ٹویٹر اکاؤنٹ کھولنے اور ویڈیو اپ لوڈ کرنے میں مدد کی۔ انہوں نے کہا کہ پولیس نے نو ملزمان کو گرفتار کیا تھا لیکن اب انہیں بھی پیشگی ضمانت مل گئی ہے۔
