اسلام آباد: غزّہ میں اسرائیل کے پُر تشدد حملوں کے خلاف دنیا کے متعدد ممالک کی طرف سے ردعمل کا اظہار کیا جا رہا ہے۔ پاکستان وزارت خارجہ نے کہا ہے کہ اسرائیل نے غزّہ کو فلسطینیوں کے لئے قصداً ناقابل رہائش جگہ بنا دیا ہے۔
وزارت خارجہ کی ترجمان ممتاز زہرہ بلوچ نے کہا ہے کہ اسرائیل نے غزّہ کے شہری انفراسٹرکچر اور پارلیمنٹ جیسی انتظامی عمارتوں کو تباہ کر کے غزّہ کو فلسطینیوں کے لئے قصداً ناقابل رہائش جگہ بنا دیا ہے۔
ہفتہ وار پریس کانفرنس میں اخباری نمائندوں کے لئے جاری کردہ بیان میں بلوچ نے کہا ہے کہ اسرائیل، ہسپتالوں اورفلسطینی مہاجرین کے لئے اقوام متحدہ اور مشرق قریب کی امدادی ایجنسی UNRWA سمیت انسانی امداد کی متعدد تنظیموں اور ان کے اہلکاروں پر بمباری کر رہا ہے۔ اسرائیل کے حامیوں کو اسے، فلسطینیوں کی، نسلی صفائی سے روکنا چاہیے۔
ممتاز زہرہ بلوچ نے بین الاقوامی قانون کو پسِ پُشت ڈال کر ہسپتالوں پر جاری مستقل بمباری کی طرف اشارہ کیا اور بین الاقوامی برادری سے اپیل کی ہے کہ ہسپتالوں پر حملوں کی وجہ سے اسرائیلی قابض فوجوں کو جنگی جُرم کا قصوروار ٹھہرایا جائے۔
دریں اثنا اُردن نے اسرائیل کے ساتھ شمسی توانائی کے سمجھوتے سے دستبرداری کا اعلان کیا ہے۔ اردن کے وزیر خارجہ ایمن الصفدی نے جاری کردہ بیان میں اعلان کیا ہے کہ اردن، متحدہ عرب امارات کی ثالثی میں طے پانے والے اور ہلکے پانی کے بدلے اسرائیل کو شمسی توانائی کی فراہمی کے، سمجھوتے سے دستبردار ہو رہا ہے۔
صفدی نے کہا ہے کہ اسرائیل کو، پورے علاقے کو جہنم کی طرف دھکیلنے کے، نتائج بھگتنا ہوں گے۔
دریں اثنا ناروے میں حکومت کی پیش کردہ اور آزاد فلسطینی حکومت کو تسلیم کرنے سے متعلقہ تجویز پارلیمنٹ میں واضح اکثریت کی حمایت سے قبول کر لی گئی ہے۔
مزید پڑھیں: اسرائیلی فوج کی الشفاء اسپتال میں مسلسل کارروائیاں، اموات بڑھنے کا خدشہ
ناروے ذرائع ابلاغ کے مطابق حکومت نے پارلیمنٹ میں آزاد فلسطینی حکومت کو تسلیم کرنے کی تجویز پیش کی ہے۔ تجویز میں حکومت نے اپیل کی ہے کہ کسی بھی حتمی امن سمجھوتے کی پابندی کے بغیر امن مرحلے پر مثبت پیش رفت کے لئے فلسطینی حکومت کو غیر مشروط شکل میں تسلیم کیا جائے۔
(یو این آئی)
