نئی دہلی: (یو این آئی) بحران زدہ یوکرین میں کیف ہوائی اڈے کے بند ہونے کے بعد ہندوستانی حکومت اپنے شہریوں کو نکالنے کے لیے متبادل راستے تلاش کر رہی ہے اور نجی ایئر لائنز کے ساتھ رابطے میں ہے۔ پیش رفت کے بارے میں علم رکھنے والے دو افراد نے یہ اطلاع یواین آئی کو دی۔ دریں اثنا، یوکرین کی صورتحال کے حوالے سے دارالحکومت دہلی میں واقع وزارت خارجہ میں ایک اعلیٰ سطحی میٹنگ ہو رہی ہے۔ ذرائع نے بتایا کہ یوکرین میں وہاں رہنے والے ہندوستانیوں کے محفوظ انخلاء کے لیے ہنگامی منصوبہ بندی پر بھی غور کیا جا رہا ہے۔ ذرائع نے بتایا کہ کیف میں ہندوستانی سفارت خانہ اپنا کام صحیح طریقے سے کر رہا ہے اور حکومت نے وہاں کچھ اور اہلکار بھیجے ہیں جو روسی جانتے ہیں۔ وزارت خارجہ نے دہلی میں ایک ہنگامی کنٹرول روم قائم کیا ہے جو 24×7 کام کرے گا۔
ایئرلائن کمپنی کے ایک اہلکار نے بتایاکہ “ہم سے موجودہ صورتحال میں یوکرین سے پروازیں چلانے کے بارے میں پوچھا گیا تھا لیکن آج وہاں پروازیں معطل کر دی گئی ہیں۔ ہم صورتحال کا جائزہ لے رہے ہیں اور اس کے بعد حکومت کو آگاہ کریں گے۔
یوکرین انٹرنیشنل ایئر لائنز (یو ای اے) کی ٹکٹنگ ایجنسی چلانے والی اسٹک ٹریولز کے ایک اہلکار نے بتایا کہ یوکرین میں زیر تعلیم طلباء کے رشتہ دار ہم سے مسلسل رابطے میں ہیں اور پرواز کے بارے میں اطلاعات مانگ رہے ہیں۔ یوکرین پر روس کی فوجی کارروائی کے بعد اس کے ذہن میں غیر یقینی صورتحال پیدا ہو گئی ہے۔
ذرائع نے بتایا کہ ایک خیال یہ بھی ہے کہ حکومت یوکرین میں مقیم ہندوستانی شہریوں کو اپنی مغربی سرحد کی طرف جانے کو کہے اور پھر انہیں وہاں سے نکالنے کے انتظامات کرے۔ یوکرین کی مغربی سرحد سے لوگ آسانی سے پولینڈ، مالڈووا یا رومانیہ پہنچ سکتے ہیں اور وہاں سے انہیں ہندوستان بھیجا جا سکتا ہے۔
قبل ازیں، کیف میں ہندوستانی سفارت خانے نے ایک ایڈوائزری جاری کیا تھا جس میں یوکرین میں رہنے والے ہندوستانیوں کو محفوظ اور پرامن طریقے سے رہنے کا مشورہ دیا گیا تھا۔ سفارت خانے نے کہا کہ جو ہندوستانی کیف کی طرف آرہے ہیں وہ اپنے شہروں کو واپس چلے جائیں۔ سفارت خانے نے کہا ہے کہ اس وقت ان کے لیے مناسب ہو گا کہ وہ عارضی طور پر یوکرین کی مغربی سرحد سے متصل ممالک کے قریب رہیں۔
سفارت خانے نے بتایاکہ “اس وقت یوکرین میں کافی غیر یقینی صورتحال ہے۔ براہ کرم امن برقرار رکھیں اور محفوظ رہیں اور جہاں بھی آپ اپنے گھر، ہاسٹل، ہوٹل، رہائش یا سفر میں ہوں احتیاطی تدابیر اختیار کریں۔” یوکرین پر روس کی فوجی کارروائی کے بعد کیف کے لیے پروازیں واپس لوٹ گئیں ہیں۔
