کشمیر: جموں و کشمیر کے مشہور سیاحتی مرکز ڈل جھیل میں ہفتہ کی علی الصبح زبردست آگ لگ گئی، جس میں کروڑوں روپے کی املاک جل کر راکھ ہو گئی۔ وہیں بنگلہ دیش سے تعلق رکھنے والے تین سیاح بوٹ میں آگ لگنے سے ہلاک ہو گئے۔ پولیس نے بتایا کہ یہ لاشیں آج علی الصبح جھیل پر کئی گھریلو کشتیوں میں زبردست آگ لگنے سے جل جانے کے چند گھنٹے بعد ملی ہیں۔
موصولہ اطلاع کے مطابق، ہاؤس بوٹ میں آگ لگنے سے ہلاک ہونے والے تینوں سیاح بنگلہ دیشی شہری ہیں، جو سفینہ ہاؤس بوٹ میں مقیم تھے۔ آگ لگنے سے یہ ہاؤس بوٹ مکمل طور پر جل گیا۔ پولیس نے بتایا کہ ڈل جھیل کے گھاٹ نمبر 9 کے قریب ایک ہاؤس بوٹ میں آگ بھڑک اٹھی جو تیزی سے پھیل گئی اور دیگر ہاؤس بوٹس کو بھی زد میں لے لیا۔ ہاؤس بوٹس لکڑی سے بنی ہیں۔ اس لیے جب تک مدد پہنچی آگ کافی حد تک پھیل چکی تھی۔ ضلع انتظامیہ نے اس واقعہ پر افسوس کا اظہار کرتے ہوئے واقعہ کی تحقیقات کا حکم دیا ہے۔
مزید پڑھیں: راجستھان میں چار سالہ دلت بچی کے ساتھ درندگی، پولیس انسپکٹر گرفتار
پولیس حکام نے بتایا کہ کم از کم پانچ گھریلو کشتیاں تباہ ہو گئیں اور کچھ دیگر کو نقصان پہنچا۔ آگ لگنے کی وجہ تاحال معلوم نہیں ہوسکی ہے۔ لیکن آگ اتنی خوفناک تھی کہ وہاں بھگدڑ مچ گئی۔ جب ہاؤس بوٹس میں سے ایک میں آگ لگی تو اس میں بہت سے لوگ موجود تھے۔ بہت سے لوگ بچ گئے لیکن کچھ لوگ ان میں پھنس گئے۔
