نئی دہلی: مرکزی وزیر داخلہ امیت شاہ یوم جمہوریہ کے دن ٹریکٹر ریلی میں شامل تحریک چلانے والوں کے ساتھ جھڑپ میں زخمی ہوئے پولیس اہلکاروں سے آج اسپتال جاکر ملے۔
شاہ جمعرات ککو دن میں تیرتھ رام اسپتال اور سروشوت ٹراما سینٹر گئے اور وہاں زیر علاج پولیس اہلکاروں سے ملے۔
وزیر داخلہ نے خود ٹوئٹ کرکے اس کی اطلاع دی۔ انہوں نے کہا ’’زخمیوں سے مل رہا ہوں۔ ہمیں ان کی بہادری اور شجاعت پر فخر ہے‘‘۔ انہوں نے ٹوئٹ کے ساتھ اسپتال دورے کی اپنی تصویر بھی مشترک کی ہے۔
شاہ نے اس دوران زخمی پولیس اہلکاروں سے بات کی اور ان کا حال دریافت کیا نیز واقعہ کے بارے میں بات کی۔ انہوں نے ڈاکٹروں سے بھی زخمیوں کے علاج کے بارے میں بات کی۔ وہ اپنے ساتھ زخمیوں کے لئے پھل بھی لائے تھے۔
واضح رہے کہ ٹریکٹر ریلی کے دوران تحریک چلانے والوں کے ساتھ جھڑپ میں 200 سے زیادہ پولیس اہلکار زخمی ہوگئے تھے۔ انہیں علاج کے لئے دلی کے مختلف سپتالوں میں داخل کرایا گیا ہے۔
شاہ کے ساتھ مرکزی داخلہ سکریٹری اجے بھلہ اور دلی پولیس کے کمشنر این این شریواستو بھی موجود تھے۔
