نئی دہلی (ایس این بی) : اقلیتی برادری سے تعلق رکھنے والے پہلی سے بارہویں جماعت تک کے سرکاری اسکولوں میں پڑھنے والے طلبا کے لیے ٹیوشن فیس اور دیگر لازمی فیسوں کی واپسی کے لیے دہلی سرکارکے نوٹیفکیشن کو ہائی کورٹ میں چیلنج کیا گیا ہے۔ ایک سی اے اویناش ملہوترہ نے یہ چیلنج دیا ہے اور اس سے متعلق عرضی دائر کی ہے۔ ان کی عرضی کا نوٹس لیتے ہوئے عدالت نے دہلی سرکار اور اس کے ڈائریکٹوریٹ آف ایجوکیشن اور دہلی اقلیتی کمیشن سے جواب طلب کیا ہے۔چیف جسٹس ستیش چندر شرما اور جسٹس سبرامنیم پرساد کی بنچ نے سبھی فریقین سے جواب طلب کرتے ہوئے سماعت 13 دسمبر تک ملتوی کردی۔
درخواست گزار نے کہا ہے کہ اسکیم کے مطابق اگر اقلیتی طبقہ کا کوئی طالب علم جو سالانہ 3 لاکھ روپے کماتا ہے، دہلی کے کسی تسلیم شدہ سرکاری اسکول میں پڑھ رہا ہے، تو وہ اپنے بچے کی ٹیوشن فیس اور دیگر لازمی فیسوں کی واپسی حاصل کرنے کا اہل ہے، لیکن یہ پالیسی آئین کے آرٹیکل 14 اور 15 کی خلاف ورزی ہے، کیونکہ یہ پالیسی تمام کم آمدنی والے خاندانوں کے تمام طلبا کو مندرجہ بالا فوائد فراہم نہیں کرتی ہے اور وہ اس کے حقدار نہیں ہیں۔
درخواست گزار نے عرض کیا ہے کہ ری ایمبرسمنٹ اسکیم صرف اقلیتی طبقوں کے طلبہ کے لیے ہے۔ یہ اسکیم دیگر کم آمدنی والے خاندانوں کو مذہب اور ذات کی بنیاد پر محروم کرتی ہے، جبکہ اقلیتی طلبا کو اس طرح کے فوائد فراہم کرنے کے بارے میں کوئی ڈیٹا موجود نہیں ہے۔ اس طرح سرکارکی یہ اسکیم مذہب اور ذات پات کی بنیاد پر لوگوں میں تفریق کر رہی ہے جو کہ آئین کے خلاف ہے۔ انہوں نے کہا کہ ایک اقلیتی خاندان کا بچہ جس کی سالانہ آمدنی 3 لاکھ روپے ہے وہ ٹیوشن فیس اور دیگر چارجز لینے کا حقدار ہے لیکن دوسرے مذہب اور ذات کا وہی بچہ جس کی سالانہ آمدنی 1 لاکھ روپے ہے وہ یہ حاصل کرنے کے قابل نہیں ہے۔ فائدہ اس طرح، یہ پالیسی غیر منصفانہ اور واضح طور پر من مانی ہے۔ اسے منسوخ کیا جانا چاہئے. نیز سرکار کو ہدایت کی جائے کہ وہ اس پالیسی کا فائدہ تمام کم آمدنی والے خاندانوں کو فراہم کرے۔
