جے پور:راجستھان کے وزیراعلیٰ اشوک گہلوت نے کہا ہے کہ مرکز میں بی جے پی حکومت نے اہم مسائل سے لوگوں کی توجہ ہٹانے کے لئے شہریت ترمیمی قانون لایا ہے۔
گہلوت نے آج ریاستی کانگریس ہیڈکوارٹر پر ریاستی کانگریس کمیٹی کے تمام کارکنوں، ضلع صدور، گزشتہ لوک سبھا انتخابات اور اسمبلی انتخابات کے پارٹی امیدواروں، مختلف سیلز کے ریاستی صدور، کنوینروں کی مشترکہ میٹنگ سے خطاب کررہے تھے۔ میٹنگ میں مجاہد آزادی نیتاجی سبھاش چندر بوس کی سالگرہ پر انہیں خراج عقیدت پیش کیا گیا۔ میٹنگ کی صدارت ریاستی کانگریس کے صدر اور ڈپٹی وزیراعلی سچن پائلٹ نے کی۔گہلوت نے کہا کہ مرکز کی بی جے پی حکومت کی غلط پالیسیوں کی وجہ سے ملک کی معیشت خراب ہوئی ہے۔ نوجوان بے روزگاری سے پریشان ہیں اور عوام مہنگائی سےمتاثر ہے۔ انہوں نے مرکز کی بی جے پی حکومت کی کرنی اور کتھنی میں فرق بتاتے ہوئے کہا کہ آج ریاستوں کو قانون کے مطابق ملنے والی آمدنی کے حصے کوبھی مرکزی حکومت نہیں دے رہی ہے۔انہوں نے کہا کہ نوجوانوں کے سامنے بے روزگاری سمیت دیگر چیلنجز ہیں، ان مسائل کو راہل گاندھی 28 جنوری کو جے پور میں’ نوجوان اشتعال ریلی‘ کے ذریعہ لوگوں کے سامنے پیش کریں گے۔
