نعیم خان
چنڈی گڑھ(ایس این بی) :ہریانہ کے وزیر اعلیٰ منوہر لال نے مرکزی وزیر خزانہ نرملا سیتا رمن سے مطالبہ کیا ہے کہ وہ این سی آر خطے کو مدنظر رکھتے ہوئے ہریانہ کو خصوصی اقتصادی پیکیج دیں۔ انہوں نے کہا کہ ہریانہ کے 14 اضلاع ہیں جو این سی آر خطہ میں شامل ہیں۔ ہریانہ کو اس بات کو ذہن میں رکھتے ہوئے ایک خصوصی اقتصادی پیکیج دیا جانا چاہئے کہ ان علاقوں میں انفرااسٹرکچر کی تعمیر اور دیکھ بھال کے لئے بہت سارے وسائل خرچ کرنے پڑتے ہیں۔ وزیر اعلیٰ جمعہ کو دہلی میں مرکزی وزیر نرملا سیتا رمن کے ساتھ قبل از بجٹ مشاورتی میٹنگ میں بات کر رہے تھے۔
میٹنگ کے دوران وزیر اعلیٰ منوہر لال نے کہا کہ ہریانہ کا 25,327 مربع کلومیٹر کا علاقہ اور 164.3 لاکھ آبادی این سی آر کے تحت آتی ہے۔ یہ خطہ بنیادی ڈھانچے، پانی، صفائی ستھرائی، شہری ترقی اور رابطے کے لیے بہت زیادہ وسائل استعمال کرتا ہے۔ انہوں نے کہا کہ این سی آر میں ہریانہ حکومت نے کے ایم پی ایکسپریس وے، ریل آربیٹل پروجیکٹ، کے ایم پی کوریڈور کے ساتھ 2.5 لاکھ ہیکٹیئر کے 5 شہروں کی ترقی پنچ گرام وژن کے طور پر، نارنول میں انٹیگریٹیڈ ملٹی ماڈل لاجسٹکس ہب، گنور میں بین الاقوامی ہارٹی کلچر مارکیٹ اور دیگر بڑے پروجیکٹوں پر رقم خرچ کیا ہے۔ ہریانہ حکومت کا ان پروجیکٹوں کے نفاذ کے لیے مرکزی حکومت سے خصوصی پیکیج کا مطالبہ بالکل جائز ہے۔منوہر لال نے مرکزی حکومت، وزیر اعظم نریندر مودی اور وزیر خزانہ محترمہ نرملا سیتا رمن کا شکریہ ادا کیا کہ وہ 2022-23 میں بھی 50 سال کے بلاسود قرض کی شکل میں ریاستوں کو کیپٹل انویسٹمنٹ اسکیم کے لیے خصوصی امداد جاری رکھیں۔ وزیر اعلیٰ نے کہا کہ ریاست ہریانہ کو 2022-23 میں اس اسکیم کے تحت ہریانہ آربیٹل ریل کوریڈور پروجیکٹ کے نفاذ کے لیے 874 کروڑ روپے ملے ہیں۔ انہوں نے مرکزی حکومت سے اس اسکیم کو مستقبل میں بھی جاری رکھنے کی درخواست کی۔ہریانہ کے وزیر اعلیٰ منوہر لال نے کہا کہ ریاست نے صحت کے بنیادی ڈھانچے اور طبی تعلیم کی ترقی میں بہت ترقی کی ہے۔ ہریانہ کے ہر ضلع میں یا تو میڈیکل کالج کھل گئے ہیں یا پھر کھولنے کا عمل شروع ہو گیا ہے۔ ہریانہ میں میڈیکل کالجوں میں انڈرگریجویٹ سیٹوں کی تعداد 2015 میں 700 سے بڑھ کر 2025 تک 3035 ہو جائے گی۔ میڈیکل کالجوں کی تعمیر اور آپریشن بہت زیادہ سرمایہ دارانہ ہے، اس طرح کے ہر پروجیکٹ پر 700 کروڑ روپے سے زیادہ کی سرمایہ کاری کی گئی ہے۔ وزیر اعلیٰ نے مطالبہ کیا کہ مرکزی حکومت ریاست میں ان میڈیکل کالجوں کو کھولنے کے لیے خصوصی مالی امداد فراہم کرے۔
