نئی دہلی(یو این آئی): بہوجن سماج پارٹی (بی ایس پی) کے لوک سبھا رکن دانش علی بدھ کو اپنے حامیوں کے ساتھ کانگریس میں شامل ہو گئے۔
اتر پردیش کے کانگریس جنرل سکریٹری انچارج اویناش پانڈے اور پارٹی کمیونیکیشن ڈپارٹمنٹ کے انچارج پون کھیڑا نے یہاں پارٹی ہیڈکوارٹر میں پریس کانفرنس کے دوران انہیں کانگریس میں شامل کرایا۔
انہوں نے کہا کہ امروہہ کے رکن پارلیمنٹ دانش علی کے کانگریس میں شامل ہونے سے ملک میں انصاف کی لڑائی کو تقویت ملے گی۔ انہوں نے کہا کہ انہوں نے کانگریس لیڈر راہل گاندھی کی بھارت جوڑو نیائے یاترا میں اہم کردار ادا کیا جو منی پور سے شروع ہوئی اور آخر تک مختلف مقامات پر حمایت کرتے رہے۔
یہ بھی پڑھیں: پپو یادو کی جن آدھار پارٹی کانگریس میں شامل ہوئے
مزید پڑھیں: آسام سے کانگریس ایم پی عبدالخالق نے اپنا استعفیٰ واپس لیا
موقع پر دانش علی نے کہا کہ آج ملک کے حالات کسی سے ڈھکے چھپے نہیں ہیں۔ ایک طرف جابرانہ طاقتیں ہیں اور دوسری طرف ایک ایسی طاقت ہے جو ملک کے محروم، پسماندہ اور متاثرین کو انصاف فراہم کرتی ہے۔ اس صورتحال میں اگر ہم ظالم طاقت سے لڑنا چاہتے ہیں تو ہمیں راہل گاندھی کی قیادت میں انصاف کی لڑائی میں کھڑا ہونا پڑے گا۔ ان تخریب کار قوتوں سے لڑنے کے لیے انہوں نے کانگریس میں شامل ہونے کا فیصلہ کیا ہے۔
