سنچورین(یو این آئی) : بنگلہ دیش کو اب ہر ملک میں جاکر ون ڈے میں فتح حاصل ہوگئی ہے ۔ بنگلہ دیش نے جمعہ کی رات ایک اور تاریخ رقم کی، اس ٹیم کی جنوبی افریقہ کے خلاف جنوبی افریقہ میں پہلی ون ڈے جیت ہے بنگلہ دیش کو جنوبی افریقہ کی سرزمین پر ون ڈے میں فتح کا مزہ چکھنے میں 20 سال لگ گئے ۔
سنچورین میں کھیلے گئے اس میچ میں بنگلہ دیش نے 314/7 کا اسکور بنایا اور پھر میزبان ٹیم کو 38 رنز پہلے روک دیا۔ڈیوڈ ملر نے بنگلہ دیش کو فتح سے محروم رکھنے کی پوری کوشش کی لیکن 46 ویں اوور میں آؤٹ ہوتے ہی یہ فتح مہمانوں کے لیے ایک رسم بن چکی تھی۔ ملر نے 57 گیندوں پر 79 رنز بنائے ، تقریباً ہر اوور میں باؤنڈری لگائی۔ ملر کے علاوہ ریسی وین ڈیر ڈوسن نے بھی نصف سنچری کھیلی اور 86 رنز بنا کر وہ جنوبی افریقہ کے ٹاپ اسکورر رہے لیکن ٹیم کو فتح سے ہمکنار نہ کر سکے ۔جنوبی افریقہ کی ٹیم 48.5 اوورز میں 276 رنز پر ڈھیر ہو گئی۔
اس سے قبل بنگلہ دیش کی اننگز کی خاص بات لیجنڈ آل راؤنڈر شکیب الحسن تھے جنہوں نے 77 رنز کی عمدہ اننگز کھیلی اور جنوبی افریقہ کی سرزمین پر ون ڈے کرکٹ میں بنگلہ دیش کے سب سے زیادہ اسکور میں اہم کردار ادا کیا۔ شکیب اور نوجوان بلے باز یاسر علی نے چوتھی وکٹ کے لیے 115 رنز کی شراکت قائم کی۔ یہ یاسر کی پہلی ون ڈے نصف سنچری تھی، بنگلہ دیش کی اننگز کے دوران مجموعی طور پر 11 چھکے لگے ۔ یہ غیر ملکی سرزمین پر بنگلہ دیش کی طرف سے ایک ون ڈے اننگز میں سب سے زیادہ چھکوں کا مشترکہ ریکارڈ بھی ہے ۔
مہدی حسن اور تسکین احمد وقفے وقفے سے تعاقب کرنے والی جنوبی افریقی ٹیم کو دھکے دیتے رہے جس کی وجہ سے میزبان ٹیم سنبھل نہ سکی۔ مہدی نے چار جبکہ تسکین احمد نے 36 رنز کے عوض تین وکٹیں حاصل کیں۔ٹیمبا باوما اور وان ڈیر ڈوسن میزبان ٹیم کو ابتدائی دھچکے سے نکالنے کے ذمہ دار تھے ، جوڑی نے 85 رنز کی شراکت بھی کی۔باوما کو شریف الاسلام نے پویلین کا راستہ دکھایا تاہم اس کے بعد بیٹنگ کے لیے آنے والے ڈیوڈ ملر شاندار فارم میں تھے ۔ آٹھ چوکوں اور تین چھکوں سے سجی اس اننگز کے دوران وہ میزبان ٹیم کو فتح سے ہمکنار کرنے کی کوشش کر رہے تھے لیکن 46ویں اوور میں مہدی حسن کی گیند پر سٹمپ ہو گئے ۔ ملر کے آؤٹ ہوتے ہی جنوبی افریقہ کی آخری امید بھی دم توڑ گئی، پوری ٹیم 48.5 اوورز میں 276 رنز پر ڈھیر ہو گئی۔شکیب الحسن کو ان کی شاندار اننگز پر میچ کے بہترین کھلاڑی کا ایوارڈ دیا گیا کیونکہ بنگلہ دیش کو تین ایک روزہ میچوں کی سیریز میں 1-0 کی برتری حاصل ہے ۔ دوسرا ون ڈے اتوار کو جوہانسبرگ میں کھیلا جائے گا۔
