پنچکولہ (نعیم خان ؍ ایس این بی) : مرکزی وزیر داخلہ امت شاہ نے ہفتہ کو ہریانہ کے وزیر اعلیٰ منوہر لال کھٹر کی موجودگی میں پنچکولہ سے کھیلو انڈیا یوتھ گیمز-2021 کا شاندار افتتاح کیا۔ افتتاحی تقریب کے دوران تاؤ دیوی لال اسپورٹس کمپلیکس کو رنگ برنگی روشنیوں سے جگمگا دیا گیا۔ آرمی بینڈ نے قومی ترانے کی دھن سے پروگرام کا آغاز کیا۔ اس دوران مرکزی وزیر کھیل انوراگ ٹھاکر نے بطور مہمان خصوصی شرکت کی۔تاؤ دیوی لال اسپورٹس کمپلیکس اگلے 10 دنوں تک تمغوں کے لیے کھلاڑیوں کے دم خم کا گواہ بنے گا۔ 2,262 لڑکیوں سمیت 4,700 سے زیادہ کھلاڑی5 دیسی کھیلوں اور 25 دلچسپ کھیلوں میں تمغوں کے لیے لڑیں گے۔کھیلو انڈیا گیمز میں پہلی بار، ہریانہ نے ریاست بھر میں مشعل ریلے کا اہتمام کیا۔ خصوصی طور پر تیار کیے گئے کینٹرز نے تمام اضلاع کا دورہ کیا ,کھیلوں کو فروغ دیا اور بچوں کو کھیلوں میں حصہ لینے کی ترغیب دی۔
اسٹیڈیم میں ڈرامائی انداز میں داخلے کے بعد گیمز کی مشعل روشن کی گئی۔ جہاں سے 25 دن پہلے اسے جھنڈی دکھا کر روانہ کیا گیا تھا۔ اس دوران کھلاڑیوں نے کھیل کے ضوابط اور منصفانہ کھیل کے جذبے کا احترام کرنے اور ان پر عمل کرنے کے لیے اولمپک طرز کا حلف لیا۔اس موقع پرنائب وزیر اعلیٰ دشینت چوٹالہ، ہریانہ اسمبلی کے اسپیکرگیان چند گپتا، وزیر داخلہ اور صحت انل وج، بجلی کے وزیر رنجیت سنگھ، زراعت اور کسانوں کی بہبود کے وزیر جے پرکاش دلال، وزیر تعاون ڈاکٹر بنواری لال، شہری بلدیات کے وزیر ڈاکٹر کمل گپتا، رکن پارلیمنٹ رتن لال کٹاریہ، ہریانہ اسمبلی کے ڈپٹی اسپیکررنبیر سنگھ گنگوا، سماجی انصاف اور اختیارات کے وزیر مملکت اوم پرکاش یادو، خواتین اور بچوں کی ترقی کی وزیرمملکت کملیش ڈھانڈا، کھیل اور نوجوانوں کے امور کے وزیر مملکت سندیپ سنگھ، بی جے پی کے ریاستی صدر اوم پرکاش دھنکھر، چیف سکریٹری سنجیو کوشل اور سجاتا چترویدی اور دیگر موجود تھے۔
