نئی دہلی(ایس این بی) : جمنا کے پانی کی سطح خطرے کے نشان سے تجاوز کر گئی ہے۔ اس کے ساتھ انتظامیہ نشیبی علاقوں میں رہنے والے لوگوں کو ہٹانے کا منصوبہ تیار کر رہی ہے۔ اوپری علاقوں میں شدید بارش کے بعددہلی میں جمنا ندی کے پانی کی سطح جمعہ کی شام کو 205.33 میٹر کے خطرے کے نشان کو عبور کر گئی ہے۔ افسروں نے یہ جانکاری دی۔ انتظامیہ نشیبی علاقوں میں رہنے والے لوگوں کو نکالنے کا منصوبہ تیار کر رہی ہے کیونکہ پانی کی سطح خطرے کے نشان سے تجاوز کر گئی ہے۔دہلی فلڈ کنٹرول آفس نے کہا کہ جمعہ کی شام 4 بجے یمنا ندی کے پانی کی سطح 205.38 میٹر تک پہنچ گئی۔ اس نے جمعرات کی رات ایک انتباہ جاری کیا تھا۔ فلڈ کنٹرول روم کے مطابق جمعہ کی صبح آٹھ بجے پرانے ریلوے پل پر پانی کی سطح 203.86 میٹر تھی جو سہ پہر 3 بجے تک بڑھ کر 205.29 میٹر ہو گئی۔ یمنا نگر کے ہتھنی کنڈ بیراج سے چھوڑے گئے پانی کی مقدار ایک لاکھ کیوسک سے تجاوز کرنے پر دہلی میں سیلاب کی وارننگ کا اعلان کیا جاتا ہے۔ایک افسر نے بتایا کہ اس کے ساتھ زیر آب علاقوں اور سیلاب زدہ علاقوں میں رہنے والے لوگوں کو محفوظ مقامات پر منتقل کیا جا رہا ہے۔ جمعرات کو فلڈ کنٹرول ڈیپارٹمنٹ کی طرف سے جاری کردہ الرٹ میں، تمام سیکٹر افسران کو حساس مقامات پر ریپڈ رسپانس فورس کی تعیناتی، اپنے متعلقہ علاقوں میں چوکسی رکھنے اور دریا کے پشتوں کے قریب رہنے والے لوگوں کو خبردار کرنے کے ساتھ ضروری اقدامات کرنے کا مشورہ دیا گیا ہے ۔بتایا گیا ہے کہ نشیبی علاقوں میں سیلاب کے امکان کے پیش نظر انتظامیہ اور محکمہ آبپاشی اور فلڈ کنٹرول نے 34 کشتیاں اور موبائل پمپ تعینات کر دیے ہیں۔ مشرقی دہلی کے ضلع مجسٹریٹ انیل بنکا نے کہا کہ دہلی میں جمنا کے سیلابی میدانوں اور نشیبی علاقوں میں رہنے والے تقریباً 37ہزارلوگوں کے سیلاب سے متاثر ہونے کا خطرہ ہے۔ ہم نے تمام متعلقہ محکموں کے ساتھ فلڈ کنٹرول پلان کا اشتراک کیا ہے ۔ انہوں نے کہا کہ ہم لوگوں سے محفوظ مقامات پر منتقل ہونے کی اپیل کر رہے ہیں۔انہوں نے کہا کہ اگر پانی کی سطح 206 میٹر سے تجاوز کر جاتی ہے تو ہم انہیں صاف کرنے کی کوششیں شروع کر دیں گے۔ فلڈ کنٹرول روم نے جمعرات کی سہ پہر 3 بجے ہریانہ کے جمنا نگر ضلع کے ہتھنی کنڈ بیراج سے تقریباً 2.21 لاکھ کیوسک اور آدھی رات 12 بجے تقریباً 1.55 لاکھ کیوسک پانی چھوڑنے کی اطلاع دی تھی۔ ایک کیوسک 28.32 لیٹر فی سیکنڈ کے برابر ہے۔ عام طور پر ہتھنی کنڈ بیراج پر بہاؤ کی شرح 352 کیوسک ہوتی ہے، لیکن کیچمنٹ علاقوں میں شدید بارش کے بعد پانی کا بہاؤ بڑھ جاتا ہے۔ بیراج سے چھوڑے جانے والے پانی کو دارالحکومت تک پہنچنے میں عموماً دو سے تین دن لگتے ہیں۔ محکمہ موسمیات (آئی ایم ڈی) کے مطابق بدھ کو اتراکھنڈ اور ہماچل پردیش میں چند مقامات پر بھاری سے بہت زیادہ بارش ہوئی۔ گزشتہ سال 30 جولائی کو یمنا کے پانی کی سطح خطرے کے نشان سے تجاوز کر گئی تھی اور پرانے ریلوے پل پر پانی کی سطح 205.59 میٹر تک پہنچ گئی تھی۔
